لاہور، سماجی شخصیت آصف غوری سمیت سینکڑوں افراد ایم ڈبلیو ایم میں شامل
شیعہ نیوز: رحمت اللعالمین و پیغام پاکستان کانفرنس کے دوران معروف مذہبی و سماجی شخصیت آصف غوری کی قیادت میں سینکڑوں افراد نے مجلس وحدت مسلمین میں شمولیت کا اعلان کر دیا۔ اس موقع پر بین الاقوامی شہرت یافتہ نوحہ خواں حاجی انصر اور مرکزی جلوس 8 محرم کے لائسنسدار سندر شاہ بھی موجود تھے۔ مجلس وحدت مسلمین پاکستان کے مرکزی ڈپٹی سیکرٹری جنرل علامہ احمد اقبال رضوی نے ایم ڈبلیو میں شامل ہونیوالے اراکین سے حلف لیا۔ کانفرنس سے خطاب کرتے ہوئے علامہ احمد اقبال رضوی نے کہا کہ مجلس وحدت مسلمین اپنے نام سے ہی اپنا منشور واضح کر رہی ہے، ہماری تنظیم کا اولین مقصد اتحاد بین المسلمین اور پاکستان کی ترقی و خوشحالی کیلئے مٹبت کردار ادا کرنا ہے۔
انہوں نے کہا کہ مجلس وحدت مسلمین مادر وطن پاکستان کی جغرافیائی و نظریاتی سرحدوں کی محافظ ہے اور رسول اللہ (ص) امت مسلمہ کیلئے محور اتحاد ہیں۔ مسلمانوں کے مابین دشمن لاکھ اختلافات کو ہوا دینے کی کوشش کرے لیکن توحید اور رسالت وہ نقاط ہیں، جن پر امت یک جان اور قلب واحد ہوتی ہے۔ پاکستان کی ترقی اتحاد بین المسلمین کے بغیر ناممکن ہے، اللہ تعالیٰ کی وحدانیت اور اس کے رسول ختمی مرتبت (ص) کی رسالت کا جو بھی اقرار کرتا ہے وہ مسلمان ہے، ہم میں سے کسی کو یہ حق حاصل نہیں کہ کسی کلمہ گو کو دائرہ اسلام سے خارج قرار دیں، ہمیں اختلافات پر الجھنے کی بجائے مشترکات پر باہم ہونے کی ضرورت ہے۔
انہوں نے کہا کہ مجلس وحدت مسلمین ہر مظلوم کی حامی ہے خواہ وہ غیر مسلم ہی کیوں نہ ہو اور ہر ظالم کی مخالف ہے، خواہ وہ شیعہ مسلمان ہی کیوں نہ ہو. عزاداری سید الشہداء امام حسین علیہ السلام ہماری شہہ رگ حیات ہے اور عزاداری نواسہ رسول اللہ صلی اللہ علیہ وآلہ وسلم پر کسی قسم کا سمجھوتہ ممکن نہیں۔ کانفرنس سے علامہ سید حسن رضا ہمدانی، شاعر اہلبیت عابد علی، سندر شاہ، سید حسین زیدی، آصف غوری اور ایڈووکیٹ سید اسد نقوی نے بھی خطاب کیا۔ کانفرنس کے اختتام پر وطن عزیز پاکستان کے استحکام و خوشحالی کیلئے خصوصی دعا بھی کی گئی۔
