امریکا کا اسرائیل کو جنگی ساز و سامان کی خریداری کیلئے جلد اربوں ڈالر جاری کرنیکا فیصلہ

شیعہ نیوز: امریکی عہدیدار نے کہا ہے کہ ہتھیاروں اور جنگی ساز و سامان کی خریداری کیلئے امریکا کی جانب سے جلد ہی اسرائیل کو 3.5 ارب ڈالر جاری کرنے کا امکان ہے۔ برطانوی خبر ایجنسی کے مطابق امریکی عہدیدار کا کہنا تھا کہ اسرائیل کو آئندہ کچھ ماہ میں رقم جاری کر دی جائے گی جبکہ امریکی کانگریس پہلے ہی رقم کی منظوری دے چکی ہے۔ خبر ایجنسی کے مطابق امریکی محکمہ خارجہ کے ایک ترجمان نے دو روز قبل کہا تھا کہ محکمہ خارجہ کی جانب سے کانگریس کو آگاہ کر دیا گیا ہے کہ حکومت اسرائیل کو غیر ملکی فوجی امداد کی مد میں اربوں ڈالرز کے فنڈ ریلیز کرنے کا ارادہ رکھتی ہے۔ خبر ایجنسی کے مطابق اسرائیل کو 3.5 ارب جاری کرنے کا فیصلہ مشرق وسطیٰ میں بڑھتی کشیدگی اور غزہ میں اسرائیلی حملوں کے باوجود سامنے آیا، جس میں اب تک ہزاروں افراد کی جانیں ضایع ہوچکی ہیں۔