جنوبی لبنان میں اسرائیل کی وحشیانہ بمباری، میاں بیوی شہید، بیٹی زخمی
شیعہ نیوز: اسرائیل کی درندہ صفت فوج نے جمعرات کی شام جنوبی لبنان کے قصبے قبریخا کے نواح میں ایک عام شہری کے گھر کو وحشیانہ فضائی حملے کا نشانہ بنایا، جس کے نتیجے میں ایک شہری اور اس کی اہلیہ موقع پر ہی شہید ہو گئے، جب کہ ان کی بیٹی زخمی ہوگئی۔
لبنانی سکیورٹی ذرائع کے مطابق صہیونی جنگی طیاروں نے مذکورہ گھر پر دو میزائل داغے، جس سے گھر کا بڑا حصہ تباہ ہو گیا اور جوڑا زندگی کی بازی ہار گیا۔ اس دلخراش واقعے میں ان کی دس سالہ معصوم بیٹی معجزانہ طور پر محفوظ رہی، حالانکہ جائے وقوعہ پر ایک اور شخص شدید زخمی ہوا۔
یہ بھی پڑھیں : صہیونی دشمن کے قیدیوں کو قتل کرنے کے بجائے انہیں گرفتار کرنے پر ترجیح دیں گے، القسام
یہ ظلم و جارحیت محض ایک حملہ نہیں بلکہ ایک مسلسل جرم ہے جو قابض اسرائیل نے جنوبی لبنان کے خلاف مسلط کر رکھا ہے۔
واضح رہے کہ لبنان اور قابض اسرائیل کے درمیان جنگ بندی کا معاہدہ 27 نومبر سنہ2024ء کو نافذ ہوا تھا، مگر قابض صہیونی ریاست نے اس معاہدے کی نہ صرف بارہا خلاف ورزی کی بلکہ اس دوران ہزاروں حملے کر کے 216 شہریوں کو شہید اور 508 سے زائد کو زخمی کر دیا۔
یہ حملہ اس ظلم کا تسلسل ہے جسے قابض اسرائیل نے فلسطین کے بعد اب لبنان کی سرزمین پر بھی پھیلا رکھا ہے۔ معصوم خاندانوں کے گھروں کو راکھ میں بدلنا، بچوں کو یتیم اور عورتوں کو بیوہ کرنا اب قابض اسرائیل کی ایک باقاعدہ پالیسی بن چکی ہے۔
