علامہ صادق تقوی کی مفتی منیب الرحمٰن سے ملاقات

شیعہ نیوز (پاکستانی شیعہ خبر رساں ادارہ) معروف اہل سنت عالم دین مفتی منیب الرحمٰن سے شیعہ عالم دین علامہ صادق تقوی نے ملاقات کی اور عالمی مجلس تقریب مذاہب اسلامی کے سربراہ کا پیغام پہنچایا۔

تفصیلات کے مطابق معروف عالم دین اور جامعہ نعیمیہ کراچی کے مہتمم اعلیٰ مفتی منیب الرحمٰن سے ہیئت آئمہ مساجد و علمائے امامیہ پاکستان کے مرکزی ڈپٹی سیکریٹری جنرل علامہ سید صادق رضا تقوی نے ملاقات کی اور عالمی مجلس تقریب مذاہب اسلامی کے سربراہ حجت الاسلام ڈاکٹر حمید شہریاری کا پیغام پہنچایا۔ ملاقات میں دو طرفہ اہم امور پر تبادلہ خیال کیا گیا۔

یہ خبر بھی پڑھیں کراچی بڑی تباہی سے بچ گیا، داعش کا اہم دہشتگرد گرفتار

مفتی منیب الرحمٰن نے عالمی مجلس تقریب مذاہب اسلامی کے سربراہ حجت الاسلام ڈاکٹر حمید شہریاری کی جانب سے گزشتہ دنوں پاکستان کا سفر کئے جانے اور مختلف مسالک فکر سے تعلق رکھنے والی مذہبی اور سماجی شخصیات سے ملاقات کو ایک خوش آئند عمل قرار دیتے ہوئے باہمی گفتگو اور ملاقاتوں کے سلسلے پر تاکید کی۔

مفتی منیب الرحمن نے بین المسالک ہم آہنگی اور اتحاد بین المسلمین کے فروغ کے حوالے سے کوششوں کو مزید مستحکم کرنے کیلئے اپنے اپنے عقیدے پر کاربند رہتے ہوئے دوسروں کے عقائد اور نظریات کے احترام پر تاکید کی۔ مفتی منیب الرحمن نے ملاقات کے آخر میں عالمی مجلس تقریب مذاہب اسلامی کے سربراہ حجت الاسلام ڈاکٹر حمید شہریاری کو اپنی جانب سے سلام اور دعائیں پہچانے کی تاکید کی۔