علامہ شبیر میثمی کے دھواں دھار دورے جاری، علامہ افتخار نقوی سے اہم ملاقات
شیعہ نیوز (پاکستانی شیعہ خبر رساں ادارہ) شیعہ علماء کونسل پاکستان کے مرکزی سیکرٹری جنرل علامہ ڈاکٹر شبیر حسن میثمی اور مرکزی سیکرٹری اطلاعات زاہد علی آخونزادہ نے بزرگ عالم دین حجت الاسلام و المسلمین علامہ سید افتخار حسین نقوی سے پکی شاہ مردان میں ملاقات کی۔ اس موقع پر علامہ انتصار حسین نقوی بھی موجود تھے۔
ملاقات میں قومی مسائل کے حوالے سے مختلف امور پر تبادلہ خیال ہوا، جبکہ مرکزی وفد نے افتخار حسین نقوی کی مکتب اہلبیتؑ کے حوالے سےخاندانی قوانین کی قانون سازی میں خدمات کو تاریخ ساز کارنامے سے تعبیر کیا۔
یہ خبر بھی پڑھیں دیگرمذاہب و مسالک سے قربت اختیار کرکے حق بات پہنچائی جائے
اس قانون سازی کو پرسنل لاز کے زمرے میں آئین پاکستان میں تشیع کو حاصل حقوق کی فقہ جعفریہ کے عین مطابق فراہمی کے لیے راستہ ہموار ہونے کا باعث قرار دیا، جبکہ اس تاریخ ساز کارنامے پر ان کو ہدیہ تہنیت بھی پیش کیا۔
ملاقات میں یکساں قومی نصاب تعلیم کے حوالے سے قومی مسئلے پر بھی سیر حاصل گفتگو ہوئی اور اس اہم قومی ایشو کو انتہائی حساس قرار دیتے ہوئے بزرگان کی رہنمائی سے جلد مسئلے کے حل کی جانب بڑھنے پر بھی اتفاق ہوا۔
