ڈیرہ اسماعیل خان میں ایک اور شیعہ ٹارگٹ کلنگ، سکیورٹی ادارے خاموش تماشائی

شیعہ نیوز: اطلاعات کے مطابق ڈیرہ اسماعیل خان کی تحصیل کلاچی کے علاقہ مڈی گیٹ پر کالعدم سپاہ صحابہ /  لشکر جھنگوی کے تکفیری دہشتگردوں نے فائرنگ کر کے سید تنویر حسین شاہ کو شہید کردیا۔ موٹر سائیکل پر سوار مسلح دہشتگردوں نے سید تنویر حسین شاہ پر اچانک فائرنگ کی، جس کے نتیجے میں وہ موقع پر ہی شہید ہو گئے۔ حملہ آوروں نے واقعے کے بعد فرار ہونے میں کامیابی حاصل کی۔ شہید سید تنویر حسین شاہ کو کالعدم سپاہ صحابہ /  لشکر جھنگوی کے تکفیری دہشتگردوں کی جانب سے عرصہ دراز سے جان سے مار دینے کی دھمکیاں موصول ہورہی تھیں۔

اس سے قبل بھی ڈیرہ اسماعیل خان کی تحصیل کلاچی کے علاقہ مڈی گیٹ میں مرکزی امام بارگاہ حضرت امام حسینؑ (تھلہ نمبر 1) میں رات گئے ایک زور دار دھماکہ ہوا تھا جس کے نتیجے میں امام بارگاہ کے ساتھ ملحقہ گھروں اور دکانوں کو بھی نقصان پہنچا تھا۔  جبکہ اس امام بارگاہ حضرت امام حسینؑ کے متولی شمشیر علی کو بھی تکفیری دہشتگردوں کی جانب سے سنگین نتائج کی دھمکیاں ملی تھیں جس کے بعد وہ پنجاب منتقل ہوگئے تھے۔

یہ بھی پڑھیں: ڈیرہ اسماعیل خان: کلاچی میں مرکزی امام بارگاہ حضرت امام حسینؑ کے قریب دھماکہ

ڈیرہ اسماعیل خان میں مسلسل شیعہ ٹارگیٹ کلنگ اور امام بارگاہوں پر کالعدم سپاہ صحابہ /  لشکر جھنگوی کے تکفیری دہشتگردوں کی کاروائیاں حکومت وقت اور سکیورٹی اداروں کی کاکردگی پر سنگین سوالات اٹھا رہے ہیں۔ ڈیرہ اسماعیل خان میں مسلسل شیعہ نسل کشی اور منظم انداز میں جبری نقل مکانی کروائی جا رہی ہے، جبکہ تکفیری دہشتگرد تسلسل کے ساتھ اور با آسانی کاروائیاں انجام دے رہے ہیں جبکہ ان تکفیری دھشتگردوں کے خلاف کوئی خاطر خواہ کاروائی عمل میں نہیں لائی جا رہی اور سکیورٹی کے زمہ دار ادارے آنکھوں پر پٹی باندھے اور ہاتھ پر ہاتھ دھرے بیٹھے ہوئے ہیں۔