تہران، برسی شہید ڈاکٹر نقوی کی مناسبت سے کانفرنس کا انعقاد

شیعہ نیوز (پاکستانی شیعہ خبر رساں ادارہ) برسی شہید ڈاکٹر نقوی کی مناسبت سےایران کے دارالحکومت تہران میں کانفرنس کا انعقاد کیا گیا۔

تفصیلات کے مطابق اسلامی جمہوریہ ایران کے دارالحکومت تہران میں کنونشن دانشجویان اردو زبان کے زیراہتمام ڈاکٹر محمد علی نقوی شہید کی برسی کی مناسبت سے کانفرنس منعقد ہوئی۔ کانفرنس میں افتتاحی کلمات سید حسن رضا نقوی نے ادا کیے۔ پروگرام کے آغاز میں شہید ڈاکٹر محمد علی نقوی کی حیات و خدمات پر ڈاکومنٹری دکھائی گئی۔ اہلبیتؑ یونیورسٹی کے طالب علم اسد عباس نے ترانہ شہادت پڑھا۔ کانفرنس سے ڈاکٹر محمد علی نقوی شہید کے فرزند ڈاکٹر دانش نقوی، حجۃ الاسلام مولانا میثم ہمدانی اور ڈاکٹر راشد عباس نقوی نے خطاب کیا۔

یہ خبر بھی پڑھیں سانحہ عباس ٹاؤن کو آج 10 سال بیت گئے، واللہ نہیں بھولیں گے

ڈاکٹر دانش عباس نقوی نے خطاب میں کہا کہ ڈاکٹر شہید ایک مثالی طالب علم تھے، اور زندگی بھر تعلیم کے فروغ کے لیے کوشاں رہے، آج کے طالب علموں کے لیے ڈاکٹر شہید آج بھی آئیڈیل ہیں۔ مولانا میثم ہمدانی نے ڈاکٹر راشد عباس نقوی کی تصنیف ڈاکٹر محمد علی نقوی شہید کی آئیڈیالوجی، ویژن اور حکمت عملی پر تبصرہ کرتے ہوئے کہا کہ شہید ایک ایسا گواہ ہے کہ جو ہمیشہ کے لیے شاہد ہے، ڈاکٹر محمد علی نقوی کی آئیڈیالوجی امام خمینی کا نظریہ، شہید کا ویژن فکر امام خمینی اور شہید کی حکمت عملی راہ امام خمینی اور خط امام خمینی ہے۔ مولانا میثم ہمدانی نے کہا کہ اس کتاب کے مصنف خود ڈاکٹر محمد علی نقوی کے رفیق ہیں، کتاب میں درج واقعات کے خود شاہد ہیں اور تحقیق کے اصول کے مطابق براہ راست راوی ہیں۔

تقریب سے گفتگو کرتے ہوئے کتاب کے مصنف، ڈاکٹر محمد علی نقوی شہید کے ساتھی اور سابق مرکزی صدر آئی ایس او پاکستان ڈاکٹر راشد عباس نقوی نے کہا کہ ڈاکٹر نقوی آج کے نوجوان کے لیے متقی، محنتی اور کامیاب طالب علم کے طور پر ایک مثال ہیں، شہید کا نظریہ آج بھی زندہ ہے، اس کا مطلب ہے کہ شہید بھی آج تک زندہ ہیں، ہماری ذمہ داری ہے کہ شہید کی زندگی کو نصب العین کے طور پر سامنے رکھتے ہوئے زندگی گزاریں۔ پروگرام کے آخر میں کتاب کی رونمائی کی گئی۔