ڈونلڈ ٹرمپ کا اسرائیل کے ہمدرد اور بہترین دوست ہونے کا اعلان
شیعہ نیوز (پاکستانی شیعہ خبر رساں ادارہ) امریکی صدر ڈونلڈ ٹرمپ نے اسرائیلی امریکی کونسل کی نیشنل سمٹ میں خطاب کرتے ہوئے کہا کہ امریکی صدر کی حیثیت سے اسرائیل کا سب سے ہمدرد اور بہترین دوست میرے سوا کوئی اور نہیں رہا ہوگا۔
رپورٹ کے مطابق امریکی صدر ٹرمپ نے اپنے دعوے پر زور دیتے ہوئے کہا کہ مجھ سے پہلے تمام ہی امریکی صدور نے اسرائیل سے محض زبانی وعدے کیے اور کسی ایک بھی وعدے کو پورا نہیں کیا کیوں کہ وہ سب خوف زدہ لوگ تھے اور میں وعدے پورے کرنے والا صدر بن گیا ہوں۔
امریکی صدر نے مزید کہا کہ میں نے اسرائیل سے جو وعدے کیے انہیں نبھایا اور تل ابیب سے امریکی سفارت خانے کو یروشلم منتقل کرنے کا کٹھن کام بھی میری صدارت میں ہوا جس پر مخالفین کے ساتھ ساتھ میرے اپنے بھی ناقد ہوگئے تھے لیکن میں نے کسی کی پرواہ نہیں کی۔
واضح رہے کہ امریکی صدر ڈونلڈ ٹرمپ نے عہدہ سنبھالتے ہی اپنے انتخابی وعدے یروشلم کو اسرائیل کا دارالحکومت تسلیم کرنے پر کام کرنا شروع کیا تھا اور دسمبر 2017 کو امریکی سفارت خانہ تل ابیب سے بیت المقدس منتقل کرنے کے متنازع فیصلے کا اعلان بھی کیا تھا جس پر عالمی سطح پر سخت رد عمل سامنے آیا تھا۔
