پاکستان میں حماس کے نمائندے ڈاکٹر ناجی ابوزہیر کی علامہ راجہ ناصر عباس جعفری سے ملاقات
شیعہ نیوز: پاکستان میں حماس کے نمائندے ڈاکٹر ناجی ابو زہیر کی علامہ راجہ ناصر عباس جعفری سے ملاقات، ڈاکٹر ابو زہیر نے مجلس وحدت مسلمین پاکستان کے آزادی فلسطین مارچ، ریلیوں، اجتماعات، کانفرنسز اور دیگر سرگرمیوں کو فلسطینی عوام کی طرف سے سراہتے ہوئے کہا کہ آپ ہمارے بیانیہ کی جنگ لڑ رہے ہیں۔ ہماری عزت اور کرامت کے پیغام کو آگے بڑھا رہے ہیں، ہمارے شہدا کے مقدس لہو کے پیغمبر ہیں۔ آپ ہمارے وجود کا حصہ اور فلسطین کی تحریک آزادی کا جُز ہیں۔ اس موقع پر چیئرمین مجلس وحدت مسلمین علامہ راجہ ناصر عباس جعفری نے فلسطینی کاز اور تحریک سے اپنی دلی وابستگی کی بابت آگاہ کرتے ہوئے کہا کہ ہم خون کے آخری قطرے تک آزادی فلسطین کے مقدس کاز سے پیچھے نہیں ہٹیں گے۔
اس موقع پر مرکزی جنرل سیکرٹری جناب ناصر شیرازی نے معزز مہمان کو خوش آمدید کہتے ہوئے کہا کہ ہم سیاسی، مذہبی جماعتوں، تاجر تنظیموں ، سماجی گروہوں اور انسانی حقوق کے اداروں سے مکمل رابطہ میں ہیں تاکہ فلسطین کا مسئلہ امت کے ہر فرد تک پہنچ سکے۔ انہوں نے کہا کہ ہم تمام حکومتی اکابرین تک قائداعظم کا آزادی فلسطین کا بیانیہ پہنچائیں گے جس میں اسرائیل جیسے غیرقانونی وجود کو کبھی تسلیم نہ کرنا شامل ہے اور یوں نظریہ پاکستان سے منافی کوئی بیانیہ ترویج کرنے کی اجازت نہیں دیں گے۔ فلسطینی وفد نے مجلس وحدت مسلمین کی قیادت اور کارکنوں کا ایک بار پھر شکریہ ادا کرتے ہوئے پاکستان کے غیور عوام کی فلسطین کے لئے تاریخی حمایت کو سرمایہ قرار دیا۔ ملاقات میں مجلس وحدت مسلمین پاکستان کے مرکزی جنرل سیکرٹری سید ناصر عباس شیرازی، صدر مجلس علما مکتب اہلبیت علامہ حسنین عباس گردیزی اور مرکزی رہنما ایم ڈبلیو ایم ملک اقرار حسین بھی موجود تھے۔
