اسرائیل سے بات چیت میں نرمی صرف فلسطینیوں کی جانوں کی خاطر ہے، اسماعیل ہنیہ

شیعہ نیوز: فلسطینی مزاحمتی تنظیم حماس کے رہنماء اسماعیل ہنیہ نے کہا ہے کہ اسرائیل سے بات چیت میں نرمی کے ساتھ جنگ کے لیے بھی پوری طرح تیار ہیں۔ اپنے ایک بیان میں اسماعیل ہنیہ کا کہنا تھا کہ اسرائیل سے بات چیت میں نرمی صرف فلسطینیوں کی جانوں کی خاطر ہے، حماس فلسطینیوں کے دفاع کے لیے بھی پوری طرح تیار ہے۔ اسماعیل ہنیہ کا کہنا تھا کہ مسلم دنیا اور پڑوسی ممالک کی ذمہ داری ہے کہ وہ شمالی غزہ میں قحط کی اسرائیلی سازش روکیں۔ انہوں نے اپیل کی کہ مغربی کنارے اور بیت المقدس کے فلسطینی یکم رمضان کو مسجد اقصیٰ کی طرف مارچ کریں۔ ان کا کہنا تھا کہ اسرائیل کی جانب سے مسجد اقصیٰ کا محاصرہ غزہ کے محاصرے کی طرح ناقابل قبول ہے، غزہ کی حمایت کرنے والی مزاحمتی قوتیں الاقصیٰ کے لیے بھی اپنی جنگ تیز کریں۔

دوسری جانب اسرائیلی فوج کی غزہ کے علاقے دیر البلح میں صبح سے گولہ باری جاری ہے، ناصر اسپتال پر شیلنگ کے باعث اسپتال کو ایندھن اور طبی سامان کی عدم دستیابی کا سامنا ہے۔ بمباری کے بعد قحط کے ذریعے فلسطینیوں کی نسل کشی کی اسرائیلی سازش پر اقوام متحدہ کے حکام کا کہنا ہے کہ 6 لاکھ فلسطینی قحط کے دہانے پر ہیں۔ 30 ہزار سے زائد فلسطینیوں کو شہید کرنے کے بعد اسرائیلی فوج کا کہنا ہے کہ ہم غزہ کے لوگوں سے نہیں حماس سے لڑ رہے ہیں۔