غزہ کو اسرائیلی قابض فوج کا قبرستان بنا دیا، 720 فوجی گاڑیاں تباہ، سیکڑوں فوجی ہلاک

شیعہ نیوز: اسلامی مزاحمتی تحریک حماس کے عسکری ونگ عزالدین القسام بریگیڈز کے ترجمان ابو عبیدہ نے کہا ہے کہ غزہ کو اسرائیلی قابض فوج کا قبرستان بنا دیا ہے۔

القسام بریگیڈز کے ترجمان ابو عبیدہ کا کہنا تھا کہ غزہ کی پٹی میں بری دراندازی شروع ہونے کے بعد اسرائیلی فوج کی 720 گاڑیاں اور ٹینک تباہ کردیے گئے ہیں اور سیکڑوں فوجیوں کو ہلاک اور زخمی کیا گیا ہے۔

انہوں نے کہا کہ دشمن غزہ پر مسلسل بمباری اور معصوم لوگوں کے وحشیانہ قتل عام کے باوجود اپنا اعلان کردہ جنگی ہدف پورا نہیں کرسکا ہے۔ اسرائیلی قیدی اب بھی ہمارے پاس ہیں۔ اگر وہ انہیں زندہ دیکھنا چاہتا ہے تو اسے جنگ روکنا ہوگی۔

عزالدین القسام بریگیڈز نے تصدیق کی ہے کہ غزہ کی پٹی میں تحریک کے خلاف جو جنگ چھیڑ رہی ہے اس میں اسرائیل کا اعلان کردہ ہدف ناکامی سے دوچار ہے۔

یہ بھی پڑھیں : اسرائیل کے خلاف فلسطینیوں کی مزاحمت نے دنیا کو حیران کر دیا، ابراہیم رئیسی

القسام بریگیڈز کے ترجمان ابو عبیدہ نے ایک آڈیو ریکارڈنگ میں کہا کہ ہمیں ختم کرنے کا اسرائیل کا مقصد ناکامی سے دوچار ہے۔ انہوں نے کہا کہ جنگ کو جاری رکھنا ان اسرائیلی یرغمالیوں کی رہائی کی اجازت نہیں دیتا جو اب بھی تحریک کے زیر حراست ہیں۔

دریں اثنا جمعرات کو القسام بریگیڈز نے تین اسرائیلی زیر حراست افراد کے ویڈیو کلپس نشر کیے جن کے بارے میں کہا گیا ہے کہ وہ اسرائیلی فوج کی فائرنگ سے مارے گئے تھے۔ القسام کی طرف سے شائع ویڈیو میں 3 قیدیوں ایلیا ٹولڈانو، نک پیزر اور رون شرمین کو دکھایا گیا۔ گزشتہ ہفتے اسرائیلی فوج نے اعلان کیا تھا کہ ان تین قیدیوں کی لاشیں مل گئی ہیں۔

یہ تینوں نوجوان غزہ کے علاقے شجاعیہ کالونی میں ایک عمارت سے قمیصیں اتارے ہوئے نکلے تھے، ان میں سے ایک سفید کپڑا بھی لہرا رہا تھا تاہم اس کے باوجود اسرائیلی فوج نے ان تینوں پر فائرنگ کردی تھی۔ بعد ازاں اسرائیلی فوج نے واقعہ کا اعتراف کیا اور اس پر افسوس کا اظہار کیا تھا۔ اسرائیلی فوج نے واقعہ کی شفاف تحقیقات کرانے کا بھی کہا تھا۔