
سیدالساجدین حضرت امام زین العابدین (ع) کا یوم ولادت باسعادت
شیعہ نیوز: آسمان امامت و ولایت کے چوتھے درخشاں ستارے فرزند رسولۖ، پیغام رسان کربلا سیدالساجدین حضرت امام زین العادین علیہ السلام کے یوم ولادت باسعادت کی مناسبت سے عالم اسلام اور دنیا کے مختلف اسلامی و غیر اسلامی ملکوں میں جشن و سرور کی محلفیں سجی ہوئی ہیں۔
تین شعبان آسمان امامت و ولایت کے تیسرے درخشاں ستارے نواسہ رسولۖ حضرت امام حسین علیہ السلام کے یوم ولادت باسعادت چار شعبان علمدار کربلا حضرت ابوالفضل العباس علیہ السلام کے یوم ولادت اور پانچ شعبان آسمان امامت و ولایت کے چوتھے درخشاں ستارے فرزند رسولۖ، سیدالساجدین حضرت امام زین العابدین علیہ السلام کے یوم ولادت باسعادت کی مناسبت سے جشن و نور کا جو سلسلہ گذشتہ جمعرات سے شروع ہوا تھا، پندرہ شعبان المعظم حضرت ولی عصر امام زمانہ عج اللہ تعالی فرجہ الشریف کے یوم ولادت باسعادت تک جاری رہے گا۔
یہ بھی پڑھیں : مغربی کنارے میں فائرنگ، دو اسرائیلی فوجی ہلاک، چھ زخمی
پانچ شعبان المعظم فرزند رسول اور واقعہ عاشورہ کے پیغام رساں حضرت امام زین العابدین علیہ السلام کے یوم ولادت باسعادت کی مناسبت سے پورے ایران میں جشن و سرور کا ماحول ہے اور ملک کے سبھی چھوٹے بڑے شہروں کی مساجد، امام بارگاہوں اور مقدس مقامات میں محفل میلاد کا اہتمام کیا گیا ہے- مختلف عمارتوں اور سڑکوں کو نہایت خوبصرتی کے ساتھ سجایا گیا ہے اور لوگ جگہ جگہ مٹھائیاں اور شربت تقسیم کر رہے ہیں۔
ایران اور دنیا کے دیگر ملکوں کے مسلمان عوام ان ایام میں اعیاد شعبانیہ یا شعبان کی عیدوں کے عنوان سے جشن مناتے ہیں اور اہل بیت عصمت و طہارت کے حضور اپنے والہانہ عشق وعقیدت کا اظہار کرتے ہیں- خوشی و مسرت کے اس پر مسرت موقع پر مشہد مقدس میں فرزند رسولۖ حضرت امام رضا علیہ السلام کے روضہ اطہر میں غیر معمولی جشن کا سماں ہے اور ایران اور دنیا کے دیگر ملکوں سے آئے ہوئے زائرین اس معنوی جشن میں شریک ہو کرحضرت اما م رضاعلیہ السلام کو ان کے جد بزرگوارحضرت امام زین العابدین علیہ السلام کے یوم ولادت کی مبارک باد پیش کر رہے ہیں۔
حضرت امام رضا علیہ السلام کے حرم میں محفل شعر و بیان کا بھی اہتمام کیا گیا ہے جس میں ایران کے نامور شعرا اورعلمائے کرام ماہ شعبان المعظم میں اپنے نور وجود سے دنیا کو منور کرنے والی اہلبیت اطہارعلیہم السلام کی عظیم ہستیوں خاص طور پر پانچ شعبان المعظم کی مناسبت سے امام زین العابدین علیہ السلام کے فضائل و مناقب بیان کر رہے ہیں-
قم میں بھی فرزند رسول حضرت امام زین العابدین علیہ السلام کے جشن ولادت کی مناسبت سے جناب فاطمہ معصومہ سلام اللہ علیھا کے حرم مطہر کوانتہائی شاندار طریقے سے سجایا گیا ہے اور بڑی تعداد میں موجود زائرین اس معنوی جشن میں شریک ہیں
عراق کے مقدس شہروں خاص طور پر کربلائے معلی، نجف اشرف، کاظمین اور سامرہ سے بھی اطلاعات ہیں کہ اس پرمسرت موقع پر شاندار جشن منایا جا رہا ہے جس میں عراق اور دنیا کے مختلف ملکوں کے لاکھوں زائرین اور عاشقان اہلبیت شریک ہیں۔
پاکستان، بھارت، لبنان اور شام سمیت بہت سے ملکوں میں پانچ شعبان فرزند رسول حضرت امام زین العابدین علیہ الصلوات و السلام کا یوم ولادت پورے عقیدت و احترام کے ساتھ منایا جا رہا ہے۔