حکمرانی کیلئے حضرت عمر کو فالو کرتی ہوں، مریم نواز
شیعہ نیوز: وزیراعلیٰ پنجاب مریم نواز سے مسجد نبوی کے امام ڈاکٹر صلاح بن محمد البدیر نے ملاقات کی۔ وزیراعلیٰ مریم نوازنے وزیراعلیٰ آفس پہنچنے پر ڈاکٹر صلاح بن محمد البدیرکا پرتپاک استقبال کیا۔ مریم نواز نے کہا کہ حکمرانی کیلئے حضرت عمر فاروقؓ کے ماڈل کی پیروی کرتی ہوں، حضرت عمر فاروقؓ حکمرانوں کیلئے مینارہ نور اورمشعل راہ تھے۔ مریم نوازشریف کا کہنا تھا کہ میرے والد محمد نوازشریف کیساتھ سعودی شاہی خاندان کی دوستی اوررفاقت قابل رشک ہے۔
مریم نواز نے کہاکہ ہمارا پاور ہاؤس مدینہ منورہ میں ہے، مجھے اتنا لاہورکا پتہ نہیں لیکن مدینہ منورہ کی ہر ہر گلی کا علم ہے۔ انہوں نے کہا کہ وزیراعظم شہبازشریف کے ہمراہ سعودی ولی عہد شہزادہ محمد بن سلمان کیساتھ ملاقات اچھی رہی، ولی عہد شہزادہ محمد بن سلمان بھی عوام کی خدمت کرنا چاہتے ہیں اورمیرا مشن بھی یہی ہے، شہزادہ محمد بن سلمان اخلاص کیساتھ سعودی عرب کے عوام کی خدمت کررہے ہیں۔
امام مسجد نبوی ڈاکٹر صلاح بن محمد البدیر نے کہا کہ پاکستان اور سعودی عرب آسمان پر اکٹھے چمکنے والے دو قطبی ستاروں کے مانند ہیں، پاکستان اورسعودی عرب سٹرٹیجک دوست ہیں، ماضی میں بھی تھے اور آئندہ بھی رہیں گے، محمد نواز شریف پاکستان کے دوست ہیں، ان کی لیڈر شپ پاکستان کیلئے بہتری اور فلاح کا باعث ہے، مریم نواز شریف بیٹی ہونے کے ناطے ان کے نقش قدم پر چل رہی ہیں۔
