
ریاستی ادارے پاراچنار میں جلد از جلد سیز فائر کرانے میں اپنا کردار ادا کریں، علامہ رمضان توقیر
شیعہ نیوز: پاراچنار کی کشیدہ صورتحال پر شیعہ علماء کونسل پاکستان کے مرکزی نائب صدر علامہ محمد رمضان توقیر نے فرزند قائد شہید علامہ سید علی حسینی سے ٹیلی فونک رابطہ کیا۔ اس موقع پر علامہ رمضان توقیر کا کہنا تھا کہ پاراچنار کی موجودہ صورتحال انتہائی قابل تشویش ہے، ریاستی ادارے سنجیدگی کا مظاہرہ کریں اور جلد از جلد سیز فائر کرانے میں اپنا کردار ادا کریں۔ علامہ سید علی حسینی نے بھی پاراچنار کی صورتحال پر تشویش کا اظہار کرتے ہوئے کہا کہ پاراچنار کےحالات انتہائی گھمبیر ہیں۔ اور قیمتی جانوں کا ضیاع ہو رہا ہے، راستے بند ہیں، ضروریات کی اشیاء خورد و نوش اور ادوایات کی شدید قلت ہے۔ جنگ کے زخمیوں کے علاوہ دیگر مریضوں کے لیے بھی پریشانی بڑھ رہی ہے۔
شیعہ علماء کونسل پاکستان کے مرکزی نائب صدر علامہ محمد رمضان توقیر نے کہا کہ پارہ چنار کی موجودہ صورتحال یقیناً انتہائی تشویشناک ہے، انتظامیہ اور ادارے غیر سنجیدگی کا مظاہرہ کر رہے ہیں، پاراچنار ریاست پاکستان کا حصہ ہے، ریاستی اداروں کو چاہیے کہ پاراچنار میں ریاستی رٹ کو قائم کرنے کے لئے ریاستی وسائل کا سنجیدگی سے استعمال کرتے ہوئے امن و امان کو بحال کرنے میں اپنا کلیدی کردار ادا کریں اور تمام مکاتب فکر کے جید علمائے کرام پاراچنار کے حالات میں ثالثی کا کردار ادا کرتے ہوئے ریاستی اداروں کے ساتھ تعاون کریں اور پارہ چنار کے شہریوں کی داد رسی کریں۔