مہنگائی، ناانصافی، ناامنی اور بے روزگاری نے لوگوں کا جینا دوبھر کردیا ہے: علامہ راجہ ناصر

شیعہ نیوز: مجلس وحدت مسلمین پاکستان کے چیئرمین علامہ راجہ ناصر عباس جعفری نے اپنے بیان میں کہا ہے کہ بروقت اور شفاف انتخابات سے ہی پاکستان کو استحکام اور بحرانوں سے نجات مل سکتی ہے۔

چیئرمین علامہ راجہ ناصر عباس جعفری نے کہا کہ الیکشن 2024ء میں آئین کی پاسداری کرتے ہوئے عوام کو ان کی خواہش کے مطابق حقِ رائے دہی استعمال کرنے دیا گیا اور دھاندلی نہ کی گئی، تو ملک اس بحرانی صورت حال سے نکل کر خوشحالی کی راہ پر گامزن ہو سکتا ہے، لہٰذا الیکشنز میں مزید تاخیر ملک کو مسائل کی ایسی دلدل میں دھکیل دے گا جس سے نکلنا انتہائی مشکل ہو جائے گا۔

انہوں نے کہا کہ ملکی ترقی و استحکام کا تقاضا تھا کہ ماضی کی غلطیوں سے سبق سیکھا جاتا لیکن یہاں صورت حال اس کے برعکس ہے۔

علامہ راجہ ناصر عباس جعفری نے کہا کہ سیاسی و معاشی عدم استحکام کی بدولت تمام اعداد و شمار ملکی ترقی کی بجائے تنزلی کی طرف اشارہ کر رہے ہیں، عوام میں مایوسی کی کیفیت شدت اختیار کرتی جا رہی ہے۔

انہوں نے کہا کہ مہنگائی، ناانصافی، ناامنی اور بے روزگاری نے لوگوں کا جینا دوبھر کردیا ہے۔

چیئرمین ایم ڈبلیو ایم نے کہا کہ ملک میں طاقتور اور کمزور کے لیے قانون کی تشریح اور ترجیحات الگ الگ ہیں، سیاسی و انتقامی کاروائیاں زور وشور سے جاری ہیں، صحافتی اصولوں پر عمل پیرا صحافیوں کی بلا جواز گرفتاریاں آئین وقانون کی کھلم کھلا خلاف ورزی اور ناقابل قبول ہیں۔