عراق: البلد میں امریکی ایئر بیس پر 8 تیوشا میزائلوں سے حملہ

شیعہ نیوز (پاکستانی شیعہ خبر رساں ادارہ) عراق میں امریکی فوجیوں کے زیر استعمال ایئر بیس البلد پر 8 تیوشا میزائل داغے گئے ہیں جن کے نتیجے میں متعدد فوجی زخمی ہوگئے ہیں۔

اطلاعات کے مطابق’’ البلد ایئر بیس‘‘ پر نامعلوم سمت سے 8 تیوشا میزائل داغے گئے ہیں، اس ایئربیس پر امریکی فوجی بھی مقیم تھے اور فضائی حملوں کے لیے اس بیس کو استعمال کیا کرتے تھے۔

عراقی فوج نے کہا ہے کہ میزائل حملوں میں 4 فوجی زخمی ہوئے ہیں جن میں سے 2 عراقی فضائیہ کے آفیسر اور 2 ایئرمین ہیں، دو زخمیوں کی حالت تشویشناک ہے جب کہ ایئربیس کو بھی نقصان پہنچا۔

غیر ملکی خبر رساں ادارے نے امریکی حکام کے حوالے سے دعویٰ کیا ہے کہ حملے کے وقت اس ایئربیس پر صرف 15 امریکی فوجی اور ایک طیارہ موجود تھا جو مکمل طور پر محفوظ ہیں، کشیدگی کے بعد سے امریکی فوجیوں کو محفوظ مقام پر منتقل کیا جا چکا ہے۔

البلد عراق کے ایف-16 طیاروں کا مرکزی ایئر بیس ہے، ان طیاروں کی اپ گریڈیشن کے لیے امریکی فوجی بھی کیمپ میں ہی مقیم ہیں۔

قبل ازیں اس بیس پر ایک حملے میں عراقی فوج کے اہلکاروں سمیت ایک امریکی کنڑیکٹر بھی ہلاک ہوچکا ہے۔