اسرائیل کے توسیع پسندانہ اقدامات کا ٹھوس جواب دیا جائے
شیعہ نیوز (پاکستانی شیعہ خبر رساں ادارہ) برطانوی پارلیمنٹ کے ایک سو سے زائد ارکان نے اسرائیلی حکومت کے توسیع پسندانہ اقدامات کے مقابلے میں ٹھوس مؤقف اپنانے کا مطالبہ کیا ہے۔
رپورٹ کے مطابق برٹین فلسطین آل پارٹیز پارلیمنٹری سے تعلق رکھنے والے ایک سو آٹھ اراکین پارلیمنٹ نے وزیراعظم بورس جانسن کے نام خط میں مطالبہ کیا ہے کہ وہ وادی اردن کو مقبوضہ علاقوں میں ضم کرنے سے متعلق اسرائیلی وزیراعظم کے اعلان کا ٹھوس جواب دیں۔
خط میں کہا گیا ہے کہ برطانیہ اور اس کے یورپی اتحادیوں کو چاہیے کہ وہ تل ابیب پر واضح کردیں کہ عالمی قوانین کی پامالی کے نتیجے میں اسرائیل کے ساتھ تعلقات کو نقصان پہنچے گا۔اس خطے میں وادی اردن کو ضم کرنے سے متعلق نیتن یاھو کے انتخابی اعلان کو علاقائی امن و سلامتی کے لیے سنگیں خطرہ قرار دیا گیا ہے۔
اسرائیلی حکومت کے وزیر اعظم بن یامین نیتن یاھو نے گزشتہ منگل کو اعلان کیا تھا کہ آئندہ انتخابات میں کامیابی کی صورت میں وادی اردن کو بھی اسرائیل میں ضم کرلیا جائے گا۔
دنیا کے بہت سے ملکوں اور بین الاقوامی تنظیموں نے نیتن یاھو کے اس اعلان کی سخت الفاظ میں مذمت کی ہے۔
