
کراچی واٹر کارپوریشن کا اربعین حسینی میں خصوصی انتظامات کرنے کے احکامات جاری
شیعہ نیوز: سی ای او واٹر کارپوریشن انجینئر سید صلاح الدین احمد نے کارپوریشن حکام کو چہلم شہدائے کربلا کے سلسلے میں خصوصی انتظامات کرنے کے احکامات جاری کر دیئے۔
جاری مراسلے کے مطابق متعلقہ افسران کو احکامات جاری کرتے ہوئے کہا کہ چہلم حضرت امام حسینؑ کے موقع پر ضلعی انتظامیہ، میونسپل ایڈمنسٹریشن، منتخب بلدیاتی نمائندوں سمیت تمام متعلقہ اداروں بلخصوص شیعہ علماء کرام اور جعفریہ الائنس کے رہنماؤں کے ساتھ مکمل رابطہ میں رہتے ہوئے ان کے ساتھ بھرپور تعاون کیا جائے اور چہلم شہدائے کربلا سے قبل شہر بھر بلخصوص تمام مساجد، امام بارگاہوں، مجالس، سبیلوں اور جلوس کے راستوں پر فراہمی و نکاسی آب کے مؤثر اقدامات کئے جائیں اور تمام کھلے مین ہولز پر رنگ سلیب اور کورز رکھتے ہوئے سیوریج کے اوور فلو کی صفائی کو یقینی بنایا جائے۔
مرکزی سڑکوں اور عوامی مقامات پر پانی کے رساؤ کو ختم کیا جائے، بلخصوص چہلم شہدائے کربلا کے جلوسوں کے راستوں کو مکمل صاف رکھا جائے، تاکہ شہریوں اور عزاداروں کو کسی قسم کی پریشانی کا سامنا کرنا نہ پڑے۔
انچارج ہائیڈرنٹس سیل کو ہدایات دیتے ہوئے کہا کہ چہلم شہدائے کربلا کے موقع پر متعلقہ ضلعی انتظامیہ اور قانون نافذ کرنے والے اداروں سمیت مساجد، امام بارگاہوں، مجالس، سبیلوں اور جلوسوں کے راستوں پر عوام کیلئے پینے کے پانی کی ضرورت کو پورا کرنے کیلئے مطلوبہ واٹر ٹینکرز فراہم کئے جائیں۔
تمام چیف انجینئرز اور سپڑیڈینٹ انجینئرز کو ہدایات جاری کی گئی ہے کہ وہ اپنے علاقوں سمیت مساجد، امام بارگاہوں، مجالس گاہوں اور جلوس کے راستوں کا تفصیلی معائنہ کریں، جبکہ تمام ایگزیکٹیو انجینئرز اپنے ماتحت عملے سمیت جیٹنگ اور سکشن مشینوں کے ساتھ ہائی الرٹ رہیں، تاکہ کسی ہنگامی صورت حال سے نمٹنا جا سکے۔
ایگزیکٹو انجینئر ورکشاب کو ہدایت کی گئی کہ شہریوں کی سہولت کیلئے تمام مشینری کو ہمہ وقت تیار رکھا جائے۔ سی ای او واٹر کارپوریشن انجینئر سید صلاح الدین احمد نے کہا کہ چہلم شہدائے کربلا انتظامات کے سلسلے میں کوئی کوتاہی برداشت نہیں کی جائے گی، کیونکہ شہریوں کو بہتر سہولیات فراہم کرنا ہماری اولین ترجیحات میں شامل ہے۔