کرم، ناکارہ گولہ پھٹنے سے تین بچے جاں بحق، چار زخمی

شیعہ نیوز: ضلع کرم میں ناکارہ گولہ پھٹنے سے ایک بچی سمیت تین بچے جاں بحق اور چار زخمی ہوگئے، زخمیوں کو صدہ ہسپتال پہنچا دیا گیا۔ ذرائع کے مطابق ضلع کرم میں صدہ بازار کے قریب علاقہ متخوزہ کے پہاڑی علاقے میں بچے ناکارہ گولے سے کھیل رہے تھے کہ اس دوران مارٹر کا گولہ پھٹ گیا، جس کے نتیجے میں دو بچے موقع پر جاں بحق جبکہ پانچ زخمی ہوگئے زخمی بچوں کو صدہ ہسپتال روانہ کیا گیا جہاں ایک اور بچہ جاں بحق ہوگیا جبکہ چار زخمیوں کا ہسپتال میں علاج جاری ہے۔ جاں بحق بچوں میں گل رحیم، محمد اور صدیقہ شامل ہیں۔ پولیس نے واقعے کی تحقیقات شروع کردی ہیں، پولیس کا کہنا ہے کہ حالیہ جھڑپوں کے باعث متخوزہ کے پہاڑی علاقے میں مارٹر گولہ گرتے وقت نہیں پھٹا تھا اور آج بچے اس چھیڑ رہے تھے تو زور دار دھماکے سے پھٹ گیا۔