ملت جعفریہ پاکستان پارا چنار میں جاری دھرنے کی مکمل حمایت کا اعلان کرتی ہے،جعفریہ الائنس

شیعہ نیوز: جعفریہ الائنس پاکستان کے سربراہ علامہ سید رضی جعفر نقوی نے کہا ہے کہ ملت جعفریہ پاکستان پارا چنار میں جاری دھرنے کی مکمل حمایت کا اعلان کرتی ہے، وفاقی و صوبائی حکومت سمیت ریاستی اداروں اور ضلعی انتظامیہ کویہ پیغام دینا چاہتےہیں کہ ضلع کرم کےباشندوں کوسیاسی انتقام اورفرقہ وارنہ تعصب کی بھینٹ نہ چڑھائیں اوراپنے سیاسی انتقام کا نشانہ کرم میں آباد ملت تشیع کونہ بنایاجائے اس صورتحال کا فوری سدباب کیاجائے۔

ان خیالات کا اظہار انہوں نے کراچی پریس کلب میں پریس کانفرنس کرتےہوئے کیا۔ اس موقع پر سید شبر رضا، ایس ایم نقی،علامہ نثار قلندری،علامہ باقر حسین زیدی، علامہ فرقان حیدر عابدی، علامہ رجب علی بنگش حنین علی اور سبط رضا سمیت دیگر بھی موجود تھے۔

اس موقع پر علامہ رضی جعفر نقوی کا کہنا تھا کہ ملت جعفریہ پاکستان ضلع کرم کی اس صورتحال اورحکومت اورادارروں کے بے حسی پرشدید تشویش کا شکار ہے اگر کرم کا رآستہ انسانی بنیادوں فوری کھولنےاورکم ازکم ادویات،غذائی اجناس اورایندھن کی ترسیل یقینی نہیں بنایا گیا تو ملت جعفریہ دنیا بھرمیں احتجاج کے ساتھ انسانی حقوق کےعالمی اداروں سے رجوع کرنے پرمجبور ہوگی،ضلع کرم میں مسلسل قتل عام ہو رہا ہے گزشتہ روز بھی دوپاراچناری شہریوں کوٹل سے علیزئی جاتےہوئے خوارج نے اغوا کرکے بیدردی قتل کرکے ان کے سروں کوتن سےجداکردیاجس کی ویڈیوزسوشل میڈیا پرموجود ہیں، پارا چنار کے حالات دانستہ طور پر کشیدہ کیے جارہے ہیں،کرم ایجنسی ملک کا حصہ نہیں فلسطین غزہ بن گیا ہے۔

یہ بھی پڑھیں: مظلومین پاراچنار سے اظہار یکجہتی کے لیے لاہور پریس کلب کے سامنے دھرنا جاری

انہوں نے کہا کہ پاراچنار کے راستے بند ہیں، ادویات اور اشیاء خوردونوش کی شدید کمی ہے، گزشتہ دو ماہ سے جاری محاصرے میں ابتک 30 سے زائد معصوم بچوں کی شہادتیں ہوچکی ہیں لاکھوں لوگوں کی زندگیوں کو شدید خطرات لاحق ہیں، حکومت کو چاہیئے کہ دیرپا امن کے لئے اپنے تمام تر وسائل بروئے کار لائے۔

ان کا کہنا تھا کہ پارا چنار کے معاملے پر انتظامیہ اور اعلی حکومتی عہدیداروں کی غیرسنجیدگی پورے ملک کے امن کے لیے سنگین خطرہ بن سکتی ہے۔ ان کا کہنا تھا کہ گزشتتہ چند دہائیوں سے مملکت خداداد پاکستان کو فرقہ وارنہ تعصب کی دیمک جس طرح ہمارے معاشرے کو تباہ کررہی ہے ،کرم کا یہ مہمان نواز محبت کرنے والےعلاقے کو بھی بیرونی ایجنڈے کی نظر کردیاگیا ہے اور یہاں بھی اس متعصبانہ سوچ کے تحت دہشت گردی کابازار گرم کررکھا ہے، آئے دن بیرونی عناصر خوارج اس خطے کے امن کو تہہ و بالا کردیتے ہیں جبکہ اس علاقے کے مقامی باشندے اس صورتحال سےشدید پریشان ہے وہ فرقہ وارنہ جنگ نہیں چاہتے ہیں، افسوسناک صورتحال یہ ہے کہ جس زمین کے چھوٹے ٹکرے کو بہانہ بناکر ہمیشہ فساد شروع کیا جاتا ہے وہ مسئلہ جرگہ نے حل کرلیا تھا لیکن اس باوجود وہ قوتیں جو اس علاقے میں امن نہیں چاہتیں انہوں نے سازش کے تحت جنگ چھیڑ کر دونوں فریقین کا جانی اور مالی نقصان کرےعلاقےکے امن کوتھس نہس کردیا ہے۔

یہ بھی پڑھیں: شدید ترین سردی کے باوجود پاراچنار میں 5 روز سے دھرنا جاری

انہوں نے کہا ضلع کرم میں شیعہ وسنی عوام کبھی بھی لڑائی نہیں چاہتے۔ مستقل بنیادوں پر جنگ بندی کو یقینی بنانے میں عملی کردار ادا کرنا چاہیے۔پارا چنار کے اعلی انتظامی افسران کو متعدد بار متنبہ کیا جاتا ہے کہ پارا چنار ایک حساس علاقہ اور شرپسندوں کے نشانے پر ہے یہاں سیکورٹی کے فول پروف انتظامات کی اشد ضرورت ہے۔لیکن انتظامیہ کی طرف سے خاطر خواہ انتظامات نہیں کیے جاتے جس کی وجہ سے گزشتہ دنوں سفاک دہشتگردوں کے حملے میں معصوم بچے،خواتین اور بزرگوں کی شہادت ہوئی۔

انہوں نے کہا کہ کرم میں مقیم اقلیتی برادری خصوصا مسیحی برادری اس صورتحال کیوجہ سےشدید پریشانی کا شکارہیں اوروہ رآستوں کی بندش کی وجہ سے کرسمس کا تہوار متاثرہورہا ہے ۔ علامہ رضی جعفر نقوی نے وفاقی حکومت صدر و وزیر اعظم پاکستان،چیف جسٹس پاکستان، آرمی چیف سے مطالبہ کیا کہ کہ پارا چنار حملوں میں ملوث طالبان،داعش و خوارج دہشتگردوں اور ان کے سہولت کاروں کے خلاف آپریشن کیا جائے۔ضلع کرم کا محاصرہ ختم کیا جائے اورپاراچنار میں غذائی قلت و ادویات کی فراہمی کو یقینی بنایا جائے