نصابی کتب میں غلطیاں‘ سیکرٹری تعلیم، چیئرمین فیڈرل بورڈ ہائیکورٹ طلب

شیعہ نیوز: اسلام آباد ہائی کورٹ نے نصابی کتب میں غلطیوں کے خلاف درخواست پر سیکرٹری تعلیم اور چیئرمین فیڈرل تعلیمی بورڈ کو ذاتی حیثیت میں عدالت طلب کر لیا ہے۔ جمعرات کو اسلام آباد ہائی کورٹ کے چیف جسٹس عامر فاروق نے خاتون شہری کی درخواست کی سماعت کی جس میں تعلیمی نصاب کی نگرانی اور سٹینڈرڈ آف ایجوکیشن ایکٹ پر عملدرآمد یقینی بنانے کی استدعا کی گئی تھی۔ اس موقع پر فیڈرل بورڈ سمیت فریقین کے وکلاء عدالتی نوٹس پر پیش ہوئے تاہم عدالتی سوالات کے جواب دینے میں ناکام رہے جس پر چیف جسٹس عامر فاروق نے برہمی کا اظہار کرتے ہوئے ریمارکس دیئے کہ آپ لوگوں کو اپنے کیس کا ہی پتہ نہیں، سادہ سا سوال پوچھا ہے بتا دیں کون نصاب تیار کرتا ہے؟ درخواست گزار نے بھی یہی کہا ہے کہ اسے پتہ نہیں چل رہا کون نصاب بنا رہا ہے؟ آپ لوگوں کو کچھ پتہ نہیں کہ کون نصاب بنا رہا ہے تو سیکرٹری ایجوکیشن کو بلالیتے ہیں۔