ملتان، سیدہ ثانیہ زہرا کے قاتلوں کی عدم گرفتاری کیخلاف احتجاجی مظاہرہ

9شیعہ نیوز: جولائی کو سسرالیوں کی طرف سے قتل ہونے والی 20 سالہ ثانی زہرا کے قاتلوں کی عدم گرفتاری کے خلاف چوک کمہارانوالہ پر احتجاجی مظاہرہ کیا گیا۔احتجاج مقتولہ ثانی زہرا کے والدین سید اسد عباس شاہ و سیدہ حنا زہرا کی قیادت میں کیا گیا۔ احتجاج میں ملتان کی سیاسی، سماجی اور انسانی حقوق کی تنظیموں سمیت مرد و خواتین کی بڑی تعداد نے شرکت کی۔ مظاہرین نے پینا فلیکس اور بینرز اٹھا رکھے تھے جن پر ثانی زہرا کے قاتلوں کو فوری گرفتار کر کے کیفرِ کردار تک پہنچانے کے نعرے درج تھے۔ مظاہرین نے انصاف دو انصاف دو ثانی زہرا کو انصاف دو، چیف جسٹس ثانی زہرا کے قتل کا نوٹس لو، ثانی زہرا کے قاتلوں کو پھانسی دو، ثانی زہرا کے قاتلوں کو فوری گرفتار کرو جیسے نعرے لگائے۔

مظاہرین سے خطاب کرتے ہوئے مقتولہ ثانی زہرا کے والد سید اسد عباس شاہ نے کہا کہ میری بیس سالہ بیٹی کو سسرال والوں نے جن میں اس کا سسر جیون شاہ، شوہر علی رضا شاہ، دیور حیدر شاہ، ساس عزرا جیون و دیگر دو خواتین نے مل کر بیدردی سے قتل کیا اور پھندا لینے کا ڈرامہ کیا۔ سید اسد عباس شاہ نے کہا کہ میری بیٹی کا ایک تین سال کا اور دوسرا نو ماہ کا بیٹا ہے وہ خود کشی نہیں کر سکتی۔ انہوں نے کہا کہ خودکشی کرنے کا جو جھوٹا ڈرامہ بنایا گیا ہے اس میں کوئی بندہ بھی یہ نہیں کہہ سکتا کہ یہ خود پھانسی لی ہے۔ سید اسد عباس شاہ نے چیف جسٹس پاکستان اور ریاست سے مطالبہ کیا ہے کہ میری بیٹی کو بیدردی سے قتل کیا گیا ہے اس کے تمام قاتلوں کو فوری گرفتار کر کے کیفر کردار تک پہنچایا جائے۔

سید اسد عباس شاہ نے کہا کہ ملتان پولیس نے موقع سے قاتل پکڑ کر چھوڑ دئیے اس لیے اب ملتان پولیس پر یقین نہیں رہا، نہ جے آئی ٹی کی کوئی رپورٹ بنی ہے۔ اگر ثانی زہرا کے قاتلوں کو گرفتار نہ کیا گیا تو میں دس محرم کا جلوس روک دونگا اور عشرہ محرم کے بعد ہر چوک پر دھرنا دونگا۔ اس موقع پر ثانی زہرا کی والدہ، بہن اور دادی نے بھی مطالبہ کیا کہ ثانی زہرا کے قاتلوں کو کیفرِ کردار تک پہنچانے کے لیے فوری گرفتار کیا جائے ورنہ شدید احتجاج کریں گی۔ مظاہرے میں علامہ قاضی نادر علوی، ڈاکٹر سید محسن شاہ، سید نوید عباس شاہ، سید اقبال مہدی زیدی ایڈووکیٹ، مزین عباس چاون، مخدوم ظہور شمسی، سید ناصر گردیزی، مبین مغل، تاجر رہنما عبدالرحمن فری اور دیگر نے شرکت کی۔