آیت اللہ شیخ زکزکی کی جسمانی حالت تشویشناک ہے، مسعود شجرہ

شیعہ نیوز (پاکستانی شیعہ خبر رساں ادارہ) اسلامی انسانی حقوق کمیٹی کے سربراہ نے نائیجیریا کی اسلامی تحریک کے بانی آیت اللہ شیخ ابراہیم زکزکی اور ان کی اہلیہ کی جسمانی حالت پر تشویش کا اظہار کرتے ہوئے خبردار کیا ہے کہ بائیجیریا کی حکومت ان کے مناسب علاج کا انتظام نہیں کررہی۔

لبنان کی العہد ویب سائٹ نے خبردی ہے کہ اسلامی انسانی حقوق کمیٹی کے سربراہ مسعود شجرہ نے لندن میں اپنے ایک بیان میں کہا ہے کہ آیت اللہ شیخ زکزکی اور ان کی اہلیہ پرعائد سخت بندشیں اس بات کو ظاہرکرتی ہیں کہ نائیجیریا کی حکومت انہیں رہا نہیں کرنا چـاہتی۔

شیخ زکزکی اور ان کی اہلیہ کی بیماری اوران کی افسوس ناک جسمانی حالت نیز جس صورتحال میں ان کو قید میں رکھا جا رہا ہے سے متعلق مسعود شجرہ نے کہا کہ  شیخ زکزکی کو ریاست کادونا کی سینٹرل جیل میں منتقل کردیا گیا ہے جہاں قیدیوں کی سلامتی اور صحت کے لئے ضروری معیارات کا فقدان ہے اور یہ جیل افریقہ کے انتہائی خطرناک جیلوں میں سے ایک ہے۔

اسلامی انسانی حقوق کے سربراہ مسعود شجرہ نے اس بات پر افسوس کا اظہار کیا کہ نائیجیریا کی عدالت نے اب تک شیخ زکزکی کے علاج کی اجازت نہیں دی ہے۔