پاکستان کی جانب سے فلسطینیوں کی غیر متزلزل حمایت کا اعلان

شیعہ نیوز: پاکستان کے اسپیکر پارلیمنٹ سردار ایاز صادق نے استنبول میں بین الاقوامی فلسطین کانفرنس سے خطاب کے دوران کہا کہ کیا صہیونی جرائم اور فلسطینیوں کی نسل کشی عالمی برادری کے لیے بیداری اور انسانیت کے لیے حقیقی امتحان نہیں ہے؟ سردار ایاز صادق کا کہنا تھا کہ بانی پاکستان محمد علی جناح نے فلسطین کی حمایت اور ناجائز صیہونی حکومت کو تسلیم نہ کرنے فیصلہ کیا اور پاکستانی عوام اپنے قائد کے نظریات پر عمل پیرا ہیں۔

پاکستان کی قومی اسمبلی کے اسپیکر کا مزید کہنا تھا کہ نہتے فلسطینی عوام کے خون کا بہایا جانا صیہونی حکومت کی تاریخ پر ہمیشہ کے لیے ایک دھبہ رہے گا اور انسانیت بڑی طاقتوں کی خاموشی کو کبھی فراموش نہیں کرے گی۔ سردار ایاز صادق نے یہ بات زور دے کر کہی کہ فلسطین کا مسئلہ کبھی بھی کسی ایک خطے، قوم یا مذہب تک محدود نہیں رہا بلکہ یہ ایک عالمی مسئلہ اور انسانی حقوق کے لیے چیلنج ہے کیونکہ مقبوضہ علاقوں میں جاری نسل کشی تاریخ انسانی میں بے مثال تباہی ہے۔

یہ بھی پڑھیں: پاک فوج نے ہمیشہ کردار، جرات اور قابلیت کے بھرپور اوصاف کو برقرار رکھا، آرمی چیف

اسپیکر پارلیمنٹ پاکستان  نے فلسطین کے دفاع کو اسلام آباد کی خارجہ پالیسی کا ایک اہم حصہ قرار دیا اور کہا کہ ہماری حمایت کبھی بھی مخصوص وقت یا حالات تک محدود نہیں رہی۔

واضح رہے کہ صیہونی حکومت نے امریکہ کی آشیرباد کے ساتھ مارچ 2025 میں جنگ بندی کی خلاف ورزی کرتے ہوئے ایک بار پھر غزہ کے خلاف تباہ کن جنگ شروع کردی ہے جس کے نتیجے میں اب تک بڑی تعداد میں عام شہری شہید اور زخمی ہو چکے ہیں۔