فلسطینی مزاحمتی گروہوں کیجانب سے صیہونی مخالف عظیم انتفاضے کی اپیل

غزہ کی پٹی پر قابض صیہونیوں کی مسلسل وحشیانہ جارحیت اور رفح پر انسانیت سوز حملوں کے تناظر میں، فلسطینی مزاحمتی گروہوں نے مغربی کنارے سمیت تمام فلسطینی عوام کے نام ایک اہم پیغام جاری کیا ہے۔

فلسطینی مزاحمتی گروہوں نے مغربی کنارے سمیت مقبوضہ بیت المقدس اور 1948ء کے مقبوضہ علاقوں کے فلسطینی عوام سے مطالبہ کیا ہے کہ وہ غزہ میں فلسطینی عوام کی حمایت اور رفح شہر کو ایک عظیم انسانی تباہی و غاصب صیہونی رژیم کی نسل کشی کی جنگ سے بچانے کے لئے ایک عظیم انتفاضہ شروع کریں۔

فلسطینی قومی و اسلامی افواج کی فالو اپ کمیٹی کہ جس میں زیادہ تر فلسطینی مزاحمتی گروہ شامل ہیں نے ایک مشترکہ بیان جاری کرتے ہوئے اعلان کیا ہے کہ غاصب صیہونی رژیم نے اپنے حامیوں کی رضامندی سے رفح پر حملے اور اس میں زمینی کارروائیوں کے تسلسل پر مبنی اپنے جارحانہ منصوبے کا آغاز کر دیا ہے جس کے بعد غاصب صیہونی نہ صرف سرحدی گزرگاہوں پر قابض ہو چکے ہیں اور غزہ کی پٹی میں انسانی امداد تک کو پہنچنے سے روک رہے ہیں بلکہ وہ ان تمام علاقوں کو بھی مسلسل نشانہ بنا رہے ہیں کہ جہاں بے گھر پناہ گزینوں نے پناہ لے رکھی ہے جبکہ غزہ کی پٹی میں فلسطینی عوام اس وقت سب سے بڑے المیے اور نسل کشی کے ساتھ دوچار ہیں۔

شیعہ نیوز: فلسطینی مزاحمتی گروہوں نے تاکید کی کہ ہم فلسطینی مزاحمت کی مکمل حمایت پر زور دیتے ہیں اور اس سے کہتے ہیں کہ وہ قابض نازی صیہونی افواج کا مقابلہ کرنے اور فلسطینی عوام کے تحفظ کے لئے ہر ضروری اقدام اٹھائے! فلسطینی قومی و اسلامی افواج کی فالو اپ کمیٹی نے اعلان کیا کہ ہم غاصب صیہونی رژیم کے ساتھ ساتھ امریکی حکومت کو بھی رفح میں فلسطینی عوام کو درپیش انسانی تباہی کا مکمل ذمہ دار سمجھتے ہیں! فلسطینی گروہوں نے عرب و اسلامی ممالک سمیت تمام بین الاقوامی اداروں و تنظیموں سے بھی مطالبہ کیا کہ وہ غزہ کی گزرگاہوں بالخصوص رفح بارڈر کراسنگ کو کھولیں اور سابقہ ​​طریقہ کار کے مطابق غزہ کی پٹی میں انسانی امداد پہنچائیں۔ اس بیان میں کہا گیا ہے کہ مصر و فلسطین کی خودمختاری میں آنے والی رفح سرحدی گزرگاہ پر قبضہ نہ صرف بین الاقوامی معاہدوں کی خلاف ورزی بلکہ بالعموم عربوں کی و بالخصوص مصر کی قومی سلامتی کے لئے بھی خطرہ ہے!

فلسطینی مزاحمتی گروہوں نے مقبوضہ مغربی کنارے و قدس شریف سمیت 1948ء کے مقبوضہ علاقوں میں موجود فلسطینی عوام سے مطالبہ کیا کہ وہ غزہ کی پٹی میں فلسطینی عوام کی حمایت اور رفح کو ایک بڑی تباہی سے بچانے کے لئے بڑے پیمانے پر انتفاضے کا اہتمام کریں۔ اس بیان میں عرب و اسلامی اقوام سمیت دنیا بھر کے تمام آزاد لوگوں سے بھی مطالبہ کیا گیا ہے کہ وہ رفح سمیت غزہ کی پوری پٹی میں موجود فلسطینی عوام کے خلاف جاری قابض صیہونی رژیم کی نسل کشی کے خلاف تمام دارالحکومتوں، شہروں، چوکوں اور یونیورسٹیوں میں مظاہروں کا انعقاد کریں!