سانحہ امامیہ مسجد کوچہ رسالدار پشاورکو ایک سال بیت گیا، قاتل آزد
شیعہ نیوز (پاکستانی شیعہ خبر رساں ادارہ) سانحہ امامیہ مسجد کوچہ رسالدار پشاورکو ایک سال بیت گیا لیکن آج تک قاتلوں کو نہیں پکڑا جا سکا اور نہ ہی کسی قسم کی کوئی پیش رفت کے بارے میں متاثرہ خاندانوں کو آگاہ کیا گیا ہے۔ اس بات کا اظہار مجلس وحدت مسلمین پاکستان خیبر پختونخواہ کے صوبائی صدر علامہ جہانزیب علی جعفری نے سانحہ کوچہ رسالدار کے شہداء کی پہلی برسی کی مناسبت سے جاری پیغام میں کیا۔
انہوں نے کہا کہ حکومت کے آئے روز نت نئے دعوؤں کے باوجود آج تک کوئی گرفتاری عمل میں نہیں لائی جا سکی، کوچہ رسالدار کے بعض شہداء اور زخمیوں کو آج تک کسی بھی شکل میں کوئی معاوضہ نہیں دیا گیا، جبکہ جس صوبے میں لوگ شہید اور زخمی ہوتے ہیں، صوبائی حکومت کی یہ ذمہ داری بنتی ہے کہ شہداء اور زخمیوں کی معاوضے کے ذریعے معاونت کرے جو کہ انکے زخموں پر کسی حد تک مرہم رکھنے کا باعث بنے۔
یہ خبر بھی پڑھیں مجلس وحدت مسلمین کا تحفظ حقوق تشیع کانفرنس کا اعلان
انہوں نے کہا کہ ہم صوبائی حکومت سے مطالبہ کرتے ہیں کہ سانحہ کوچہ رسالدار پشاور کی جوڈیشل انکوائری کرائی جائے اور غفلت برتنے والے غیر ذمہ دار افراد اور اداروں کا محاسبہ کرتے ہوئے انہیں کٹہرے میں کھڑا کیا جائے۔ ہم ارباب اختیار کو یہ بات باور کرا دینا چاہتے ہیں کہ اگر کوچہ رسالدار پشاور کے واقعے میں ملوث دہشتگردوں کو کیفرِ کردار تک پہنچایا گیا ہوتا تو دیگر واقعات بھی رونما نہ ہوتے۔
علامہ جہانزیب علی جعفری نے کہا کہ ہم شہدائے کوچہ سالدار پشاور اور پولیس لائنز مسجد پشاور کو خراج عقیدت و سلام پیش کرتے ہیں اور شہداء کے ورثاء کو باور کراتے ہیں کہ شہداء کے مقدس خون کو کھبی نہیں بھولیں گے اور مشکل و آزمائش کی اس گھڑی میں خانوادہ شہداء کے ساتھ کھڑے رہینگے۔
