سعودی عرب کے جدہ ریلوے اسٹیشن پر خوفناک آتش زدگی

شیعہ نیوز (پاکستانی شیعہ خبر رساں ادارہ) سعودی عرب کے شہرجدہ کے ریلوے اسٹیشن کی عمارت میں بڑے پیمانے پر آگ لگ گئی ہے۔

سعودی میڈیا کے مطابق حرمین اسٹیشن سے ٹرین مکہ اور مدینہ کے لیے جاتی تھی۔ جدہ میں حرمین ہائی اسپیڈ ٹرین اسٹیشن پر اچانک آگ بھڑک اُٹھی اور دیکھتے ہی دیکھتے آگ بلند شعلوں میں تبدیل ہوگئی جس کے باعث آسمان پر کالے بادل چھا گئے۔ آگ کے نتیجے میں 9 افراد زخمی ہوگئے۔

ریسکیو ادارے، سول ڈیفنس اور طبی ٹیم نے جائے وقوعہ پر پہنچ کر امدادی کاموں کا آغاز کیا اور 6 گھنٹے کی مسلسل مشقت کے بعد آگ پر قابو پالیاگیا جس کے لیے سعودی فوج کے ایک ہیلی کاپٹر کی بھی مدد لی گئی۔

آتشزدگی کے باعث ٹرینوں کی آمد و رفت معطل ہوگئی اور اسٹیشن پر موجود لوگوں کو بحفاظت باہر نکال لیا گیا۔

آگ لگنے کی وجوہات کا تعین کرنے کے لیے حکومت نے ایک انکوائری کمیٹی تشکیل دے دی ہے۔

واضح رہے کہ حرمین ریل اسٹیشن کو 6.7 بلین یورو کی خطیر رقم سے تعمیر کیا گیا تھا اور گزشتہ برس ہی اسٹیشن کا افتتاح کیا گیا تھا۔ اس اسٹیشن سے مکہ اور مدینہ جانے کے لیے 450 کلومیٹر طویل ٹریک بنایا گیا تھا۔