دھمکی آمیز خط سے پہلے ایک فون بھی آیا، شاہ محمود قریشی کا انکشاف
شیعہ نیوز (پاکستانی شیعہ خبر رساں ادارہ) سابق وزیر خارجہ شاہ محمود قریشی نے انکشاف کیا ہے کہ دھمکی آمیز مراسلے سے پہلے ایک ٹیلی فون بھی آیا تھا۔ ایک نجی ٹی وی کے پروگرام میں گفتگو کرتے ہوئے شاہ محمود قریشی نے کہا کہ ایک ملک سے دورہ روس نہ کرنے کیلئے کال آئی تھی، کہا گیا کہ عمران خان کو کہیں روس کا دورہ نہ کریں، امریکی مشیر قومی سلامتی نے پاکستانی ہم منصب کو کال کی تھی امریکا کو سمجھایا عمران خان دورے سے یوکرین کا تعلق نہیں۔ شاہ محمود قریشی نے مزید کہا کہ عمران خان کے دورہ روس میں عسکری قیادت کی مشاورت تھی عسکری قیادت کی رضامندی سے ہی عمران خان روس گئے، ہمارے اندرونی معاملات میں مداخلت کی کوشش کی گئی ہے۔
یہ خبر بھی پڑھیں امریکہ پاکستان کے اندرونی معاملات میں مداخلت کررہا ہے، ملی یکجہتی کونسل
ان کا کہنا تھا کہ عدم اعتماد ابھی پیش ہی نہیں ہوئی تھی انہیں کیسے معلوم تھا یہ بھی کہا گیا کہ آئندہ حکومت پر نئے تعلقات منحصر ہوں گے اس کا مطلب عدم اعتماد کی تمام پلاننگ کا اس ملک کو پتہ تھا۔ انہوں نے کہا کہ مراسلہ حقیقت پر مبنی ہے، جعلی نہیں جو غیرذمہ دارانہ گفتگو کر رہے ہیں وہ مناسب نہیں۔ وزارت خارجہ کے لوگ من گھڑت کام نہیں کریں گے، ہمارے سفیر پر بھی من گھڑت الزامات لگائے جا رہے ہیں، سفیر کو فی الفور برسلز بھیجنے کی بات انتہائی نامناسب ہے سفیر کو برسلز بھیجنا معمول کا تبادلہ تھا معاملے سے جوڑنا درست نہیں۔
