وزیر اعظم شہباز شریف کی ایرانی سفارتخانہ آمد، شہریوں کی شہادت پر اظہار تعزیت

شیعہ نیوز: پاکستان کے وزیراعظم میاں محمد شہباز شریف نے آج اسلام آباد میں اسلامی جمہوریہ ایران کے سفارت خانے کا دورہ کیا اور حالیہ اسرائیلی جارحیت کے دوران شہید اور زخمی ہونے والے ایرانیوں کے لیے تعزیتی کتاب پر اپنے تاثرات درج کیے۔ اس موقع پر پاکستان کے نائب وزیراعظم اور وزیر خارجہ اسحاق ڈار، وزیر اعظم کے مشیر طارق فاطمی اور سیکریٹری خارجہ بھی ان کے ہمراہ تھے۔

سفارت خانے آمد پر پاکستان میں ایرانی سفیر رضا امیری مقدم اور سفارت کے سینیئر ارکان نے وزیراعظم شہباز شریف کا استقبال کیا۔ وزیراعظم شہباز شریف نے اس مشکل وقت میں ایران کے ساتھ پاکستان کی ہمدردی اور یکجہتی کا اعادہ کرتے ہوئے ایران کے عوام اور حکومت کے ساتھ گہری تعزیت کا اظہار کیا۔

یہ بھی پڑھیں: ایران پر حملہ عالمی ضمیر کا امتحان، خاموشی تباہی کو دعوت دینے کے مترادف ہے، یورپی مبصر

انہوں نے ایرانی قوم کی استقامت اور حوصلے کو زبردست خراج تحسین پیش کرتے ہوئے شہید ہونے والوں اور زخمیوں کی جلد صحت یابی کے لیے دعا کی۔ ایران کو پاکستان کی مسلسل حمایت کا یقین دلاتے ہوئے وزیراعظم نے ایرانی سپریم لیڈر آیت اللہ علی خامنہ ای اور صدر ڈاکٹر مسعود پزشکیان کے لیے اپنی نیک خواہشات کا اظہار بھی کیا۔