شامی ہوائی دفاع کا اسرائیلی حملہ ناکام، کئی میزائل تباہ

شیعہ نیوز : شامی سرکاری خبررساں ایجنسی سانا کے مطابق شہر حلب کے نزدیک واقع ملکی اینٹی ایئرکرافٹ سسٹمز نے اپنی ہوائی حدود کے اندر چند ایک دشمن اہداف کو نشانہ بنایا ہے۔

الاخباریہ نیوز چینل نے وقوعہ کی خبر دیتے ہوئے کہا ہے کہ شامی اینٹی ایئرکرافٹس نے شہر حلب کے نزدیک واقع السفیرہ نامی علاقے میں چند ایک دشمن اہداف کو نشانہ بنا کر منہدم کر دیا ہے جو دراصل اسرائیلی لڑاکا طیاروں کے ذریعے فائر کئے گئے ہوا سے زمین پر مار کرنے والے میزائل تھے۔

شامی میڈیا کے مطابق وزارت دفاع نے اس حملے کی تائید کرتے ہوئے کہا ہے کہ غاصب صیہونی حکومت نے شامی شہر حلب کے گردونواح میں واقع ایک مقام پر ہوائی حملہ کیا تھا جو کامیابی کے ساتھ ناکام بنا دیا گیا ہے۔

اس بیان میں کہا گیا ہے کہ غاصب صیہونی حکومت نے اس مقام کی جانب چند ایک میزائل فائر کئے تھے جنہیں ملکی ہوائی دفاع کے ذریعے منہدم کر دیا گیا۔

واضح رہے کہ غاصب صیہونی حکومت اسرائیل، شامی حکومت کے ساتھ برسرپیکار دہشت گردوں کی حمایت پر مبنی اپنی سیاست کی بناء پر شامی سرزمین کے اندر موجود اہداف پر وقتا فوقتا حملے کرتی رہتی ہے جبکہ 1 ہفتہ قبل بھی غاصب صیہونی حکومت کی جانب سے شامی علاقے التنف میں موجود T-4 ایئرپورٹ پر بھی کئی ایک میزائل فائر کئے گئے تھے جنہیں شامی دفاعی سسٹمز نے بآسانی منہدم کر دیا تھا۔

دوسری طرف شامی حکومت کی جانب سے بارہا اعلان کیا جا چکا ہے کہ غاصب صیہونی حکومت اور اس کے مغربی و خطے کے اندر موجود حلیف، شامی حکومت کے خلاف برسرپیکار دہشت گردوں کی کھل کر حمایت کر رہے ہیں جبکہ شامی افواج بھی بین الاقوامی حمایت یافتہ دہشت گردوں کے قبضے سے کئی بار بڑی مقدار میں اسرائیلی اسلحہ برآمد کر چکی ہیں۔