شیعہ علماء کونسل پاکستان کے مرکزی وفد کا جامعہ حقانیہ اکوڑہ خٹک کا دورہ
وفد نے مولانا حامد الحق کے فرزند مولانا عبدالحق ثانی، ان کے بھائی مولانا راشد الحق حقانی، دیگر بھائیوں اور لواحقین و عزیزان سے تعزیت کی۔ دعائے مغفرت کرائی اور علامہ سید ساجد علی نقوی کا تعزیتی پیغام پہنچایا
شیعہ نیوز: شیعہ علماء کونسل پاکستان کے نائب صدور علامہ عارف حسین واحدی، علامہ محمد رمضان توقیر اور ڈپٹی سیکریٹری جنرل/لیگل ایڈوائزر قائد محترم جناب سید سکندر عباس گیلانی ایڈووکیٹ پر مشتمل مرکزی وفد نے جامعہ حقانیہ کے نائب مہتمم اور جمعیت علماء اسلام (س) کے سربراہ مولانا حامد الحق حقانی شہید کی رحلت پر تعزیت کے لئے جامعہ حقانیہ اکوڑہ خٹک کا دورہ کیا۔
وفد نے مولانا حامد الحق کے فرزند مولانا عبدالحق ثانی، ان کے بھائی مولانا راشد الحق حقانی، دیگر بھائیوں اور لواحقین و عزیزان سے تعزیت کی۔ دعائے مغفرت کرائی اور علامہ سید ساجد علی نقوی کا تعزیتی پیغام پہنچایا۔
وفد نے اس دہشتگردی کی شدید مذمت کرتے ہوئے تمام شہداء کے لواحقین کو تعزیت پیش کی اور حکومت سے مطالبہ کیا کہ اس افسوسناک سانحہ کے سفاک قاتلوں اور ماسٹر مائنڈز کو جلد از جلد گرفتار کر کے انصاف کے کٹہرے میں لایا جائے اور اس سازش کو بے نقاب کیا جائے۔
یہ بھی پڑھیں: قرآن کی بے حرمتی بنیادی انسانی حقوق و مذہبی آزادی کی سنگین خلاف ورزی ہے، اسحاق ڈار
انہوں نے مولانا سمیع الحق مرحوم اور مولانا حامد الحق حقانی مرحوم کی امت مسلمہ کے اتحاد کے لئے قابل قدر خدمات کو سراہتے ہوئے کہا کہ علامہ سید ساجد علی نقوی اور مولانا سمیع الحق نے اس ملک میں مشکل ترین حالات میں امت کو متحد کرنے کے لئے جرأت مندانہ قدم اٹھایا۔ انہوں نے وحدت امت کے لئے بانی کا کردار ادا کی، تمام مسالک کے جید علمائے کرام کو اکٹھا کر کے ملی یکجہتی کونسل پاکستان کا تحفہ ملک کے عوام کو دیا اور اسی کی برکت سے متحدہ مجلس عمل وجود میں آئی۔
الحمد للہ اتحاد بین المسالک کا یہ مقدس مشن آج بھی جاری ہے۔ مولانا حامد الحق حقانی نے بھی اپنے والد مرحوم کے راستے کو آگے بڑھایا، اس حادثے پر پوری قوم سوگوار ہے۔
