شیعہ سنی متحد ہوکر قبلہ اول کی آزادی کی جنگ لڑ رہے ہیں، علامہ مقصود علی ڈومکی

انجمنِ سپاہ علی اکبر علیہ السلام جیکب آباد، مجلس وحدت مسلمین اور امامیہ اسٹوڈنٹ آرگنائزیشن کے زیر اہتمام مظلوم فلسطینی عوام کے ساتھ اظہار یکجہتی کے لئے حویلی سید شیر شاہ بخاری سے ریلی نکالی گئی۔ ریلی کے اختتام پر ڈی سی چوک جیکب آباد پر منعقدہ احتجاجی اجتماع سے خطاب کرتے ہوئے مجلس وحدت مسلمین پاکستان کے مرکزی سیکرٹری تنظیم علامہ مقصود علی ڈومکی نے کہا کہ غزہ میں جاری ظلم و بربریت اسرائیلی ریاست کی بربادی کا باعث بنے گا۔ یہ مظلوموں کا خون ناحق دریائے نیل بن کر وقت کے فرعون اسرائیل کو غرق کردے گا۔ انہوں نے کہا کہ عالمی استکباری قوتوں نے شیعہ سنی کو لڑانے کے لئے کروڑوں ڈالر خرچ کئے۔

ان کا مزید کہنا تھا کہ آج شیعہ سنی متحد ہوکر قبلہ اول کی آزادی کی جنگ لڑ رہے ہیں اور فلسطین کا محاذ شیعہ سنی وحدت کا عملی ثبوت ہے۔ 56 اسلامی ممالک کے بے ضمیر حکمران چوڑیاں پہن لیں اور جنرل راحیل شریف سمیت 39 ملکوں کا نام نہاد اسلامی لشکر کہاں گم ہے؟ اس موقع پر تقریب سے صدر چیمبر آف کامرس حاجی احمد علی بروہی، چیئرمین انجمن سپاہ علی اکبر سید احسان علی شاہ بخاری، سماجی رہنماء ایڈوکیٹ عبدالحئی سومرو، ضلعی صدر ایم ڈبلیو ایم نذیر حسین جعفری، کونسلر دلمراد لاشاری، اللہ بخش میرالی و دیگر نے خطاب کرتے ہوئے مظلوم فلسطینیوں سے یکجہتی کا اظہار کیا۔