لاہور بڑی تباہی سے بچ گیا، چہلم کے جلوس پر حملے کی تیاری کرنے والے 4 دہشتگرد گرفتار
شیعہ نیوز (پاکستانی شیعہ خبر رساں ادارہ) لاہور میں چہلم امام حسینؑ کے مرکزی جلوس میں دہشت گردی کے بڑے حملے کی تیاری کرنے والے 4 دہشتگرد گرفتار کرلیے گئے۔
کاؤنٹر ٹیررازم ڈپارٹمنٹ (سی ٹی ڈی) نے موہل نوال کے علاقے میں کارروائی کرتے ہوئے 4 تکفیری وہابی دہشت گردوں کو گرفتار کر لیا۔
محکمہ انسداد دہشت گردی نے کالعدم تنظیم کے دہشتگردوں کی لاہور میں موجودگی کی خفیہ اطلاع ملنے پر موہل نوال میں چھاپہ مارا اور ملزمان کو گرفتار کر لیا۔
یہ خبر بھی پڑھیں زائرین کو سہولیات فراہم کی جائیں، غیر ضروری پابندیاں امتیازی سلوک ہے
گرفتار ملزمان میں سمیع اللہ، مشتاق، اسامہ اور عادل شامل ہیں۔
سی ٹی ڈی کا کہنا ہے کہ گرفتار ملزمان کا تعلق سعودی نواز دہشت گرد تنظیم کالعدم القاعدہ سے ہے۔ گرفتار دہشت گردوں سے بارودی مواد، ڈیٹونیٹر اور سیفٹی فیوز برآمد ہوئے ہیں۔
محکمہ انسداد دہشت گردی کے مطابق ملزمان چہلم کے جلوسوں پر حملے کی منصوبہ بندی کر رہے تھے اور ان سے مزید تفتیش جاری ہے۔
