شہید قائد کی 34ویں برسی اتحاد و یگانگت کا عظیم الشان اجتماع ہو گا۔ ناصر عباس شیرازی

شیعہ نیوز:شہید قائد عارف حسین الحسینی کی برسی میں شرکت کے لیے ملک بھر سے قافلے دو روز بعد اسلام آباد کے لیے روانہ ہوں گے۔مجلس وحدت مسلمین پاکستان کے جنرل سیکرٹری سید ناصر شیرازی کے مطابق برسی کی تقریب کا آغاز 24جولائی سہ پہر تین بجے پریڈ گراونڈ اسلام آباد میں ہو گا۔جس میں شرکت کے لیے چاروں صوبوں سمیت گلگت بلتستان اور آزادکشمیر کے تمام اضلاع سے ہزاروں کی تعداد میں کارکنان اسلام آباد پہنچیں گے۔مہدی ع برحق کانفرنس میں مختلف مکاتب فکر کے علمائےکرام، مشائخ عظام اور اہم سیاسی شخصیات کو بھی مدعو کیا گیا ہے۔ شہید قائد کی 34ویں برسی کی یہ تقریب اتحاد و یگانگت کا عظیم الشان اجتماع ہو گا۔انہوں نے کہا شہید قائد ایک نڈر اور بابصیرت رہنما تھے۔انہوں نے ہمیشہ اتحاد و اخوت کا پرچار کیا۔وہ عقائد کے نام پر امت مسلمہ کے ماںین جھگڑوں کو دشمن کا کاری ہتھیار سمجھتے تھے۔شہہد قائد کے نزدیک عالم اسلام کی کامیابی کا واحد حل اتحاد و اتفاق میں مضمر تھا۔انہوں نے کہا دور عصر میں شہید قائد کی فکر کو اپنی عملی زندگیوں پر نافذ کرنے کی اشد ضرورت ہے تاکہ دشمن کے ان ہاتھوں کو قطع کیا جا سکا جو بھائی کو بھائی سے لڑا کر ہمارے گریبانوں کی طرف بڑھ رہے ہیں۔انہوں نے کہا شہید قائد کی برسی کا یہ اجتماع اسلام آباد ایک تاریخی پروگرام ہو گا