صدر رئیسی کی شہادت ایران سمیت پوری امت مسلمہ کا ناقابل تلافی نقصان ہے، محمد حسین محنتی
شیعہ نیوز: جماعت اسلامی سندھ کے امیر محمد حسین محنتی نے اسلامی جمہوریہ ایران کے صدر آیت اللہ ڈاکٹر سید ابراہیم رئیسی کی ساتھیوں سمیت ہیلی کاپٹر حادثے میں شہادت پر دلی دکھ کا اظہار کرتے ہوئے کہا ہے کہ اس سانحہ پر پوری امت غمگین ہے، عالم اسلام ایک نڈر اور جرأت مند رہنما سے محروم ہو گیا ہے۔ اپنے تعزیتی بیان میں محمد حسین رئیسی نے کہا کہ ایرانی صدر رئیسی ایک دبنگ انسان تھے، جو امریکا کی تمام دھمکیوں اور پابندیوں کے باوجود اپنے مؤقف پر ڈٹے رہے اور اپنے ملک و قوم کی فلاح و بہبود و ترقی کیلئے اقدامات کرتے رہے۔ انہوں نے کہا کہ صدر رئیسی کی کوششوں سے مسئلہ فلسطین، غزہ، حماس کے مجاہدین اور اہل فلسطین کو بڑا حوصلہ ملا۔
محمد حسین محنتی نے کہا کہ صدر رئیسی نے پاکستان کے ساتھ خوشگوار و مضبوط تعلقات استوار رکھنے میں بھی بڑا اہم کردار ادا کیا، حالیہ دورہ پاکستان کے موقعے پر انہوں نے علماءکرام اور سیاسی رہنماؤں سے ملاقات میں واضح کیا کہ ایران دنیا میں اسلام کے غلبہ کا علمبردار ہے، اسلام مخالف قوتوں کی ہر سازش کو ناکام بنا دیں گے۔ انہوں نے کہا کہ سعودی عرب کے ساتھ کشیدگی ختم اور صورتحال کو معمول پر لانے اور اتحاد امت میں بھی ان کے حکیمانہ کردار کو فراموش نہیں کیا جا سکتا، صدر رئیسی کی شہادت ناصرف ایرانی قوم بلکہ پوری امت کا ناقابل تلافی نقصان ہے۔ محمد حسین محنتی نے کہا کہ جماعت اسلامی اور پوری پاکستانی قوم ایرانی قوم کے ساتھ اس دکھ میں برابر کی شریک ہے، اللہ تعالیٰ مرحومین کی مغفرت، درجات بلند اور پسماندگان کو صبر جمیل عطا فرمائے۔
