فلسطینی عوام پر جو ظلم ہو رہا ہے اس کی مثال تاریخ انسانیت میں نہیں ملتی، ڈاکٹر یعقوب بشوی

شیعہ نیوز: اسلامی جمہوریہ ایران کے مقدس شہر قم میں فلسطین اور غزہ کی حمایت میں مختلف ممالک کے علماء اور طلاب کا مشترکہ اجلاس منعقد ہوا۔ بین الاقوامی اجلاس سے خطاب کرتے ہوئے ڈاکٹر یعقوب بشوی نے کہا کہ فلسطینی عوام پر جو ظلم ہو رہا ہے اس کی مثال تاریخ انسانیت میں نہیں ملتی۔ ان کا کہنا تھا کہ ہزاروں بچے، خواتین، بیمار شہید ہو چکے ہیں اور یہ سلسلہ 70 سال سے جاری ہے، مسلمانوں کا قبلہء اول پر ناجائز صہیونیوں کا غاصب قبضہ ہے اور پورے فلسطین کو زندان میں تبدیل کیا ہوا ہے، لیکن مسلم حکمران بے غیرتی کے آخری درجہ سے بھی نیچے گرچکے ہیں۔

انہوں نے مزید کہا کہ امریکہ اور مغربی ممالک کے اشارے پر اقتدار میں آنے والے مزدوروں سے کوئی خیر کی توقع نہیں ہے، ان تمام خیانتوں کے باوجود، فلسطینی عوام کی جرأت، ہمت، حوصلہ اور بہادری قابل فخر ہے اور یہی استقامت آزادی اور فتح کی نوید ہے قرآن مجید سورۂ بنی اسرائیل کی آیات 3 سے 7 تک یہود اور فلسطین سے متعلق پیشگوئی پر مشتمل ہیں، ان آیتوں میں اسرائیل کی نابودی اور فلسطین کی آزادی کی بشارت موجود ہے، آج ہماری ذمہ داری دنیا کے ہر مظلوم کی حمایت اور ہر ظالم کی مخالفت ہے۔