ٹرمپ مودی اعلامیہ یکطرفہ، گمراہ کن اور سفارتی اصولوں کے منافی، پاکستان
شفقت علی خان نے سعودی عرب میں فلسطینی عوام کے لئے ایک ریاست کے قیام سے متعلق اسرائیلی وزیر اعظم کے حالیہ بیان کی مذمت کرتے ہوئے اسے "غیر ذمہ دارانہ، اشتعال انگیز اور بلا سوچے سمجھے‘‘ قرار دیتے ہوئے کہا کہ یہ فلسطینی عوام کے حق خود ارادیت اور ان کی اپنی تاریخی اور قانونی سرزمین پر ایک آزاد ریاست کے جائز حقوق کی خلاف ورزی اور نظرانداز کرنے کے مترادف ہے
شیعہ نیوز: پاکستان کے دفتر خارجہ کے ترجمان شفقت علی خان نے جمعہ کو ہفتہ وار پریس بریفنگ میں امریکی صدرڈونلڈ ٹرمپ اوربھارتی وزیراعظم نریندر مودی کی ملاقات کے مشترکہ اعلامیے میں پاکستان سے متعلق حوالے کو ’’یکطرفہ، گمراہ کن اور سفارتی اصولوں کے منافی‘‘ قرار دیتے ہوئے کہا کہ یہ اعلامیہ خطے اور اس سے باہر دہشت گردی، تخریب کاری اور ماورائے عدالت قتل کی وارداتوں کی بھارتی سرپرستی پر پردہ نہیں ڈال سکتا۔
پاکستان کے دفتر خارجہ کے ترجمان نے کہا کہ امریکہ کی جانب سے بھارت کو جدید ٹیکنالوجی کے ہتھیاروں کی فراہمی کے اعلان پر پاکستان کو تشویش ہے کیونکہ اس سے خطے میں طاقت کا توازن بگڑنے کا خدشہ ہے اور یہ جنوبی ایشیا میں پائیدار امن کے حصول میں بھی مددگار نہیں ہو گا۔
یہ بھی پڑھیں: ایران کے شہر کرمان کے حملے میں ملوث داعش کے عناصر کو پاکستان میں گرفتار کر لیا گیا
شفقت علی خان نے مزید کہا کہ امریکہ کے ساتھ انسداد دہشت گردی کے تعاون کے باوجود پاکستان کا حوالہ دیاگیا ہے اس طرح کے حوالہ جات اس تلخ حقیقت سے بین الاقوامی توجہ نہیں ہٹا سکتے کہ بھارت مسلمانوں اور دیگر اقلیتوں کے خلاف نفرت انگیز جرائم کے مرتکب عناصر کے لئے محفوظ پناہ گاہ ہے۔ مشترکہ اعلامیے میں بھارت کی جانب سے اقوام متحدہ کی سلامتی کونسل کی قراردادوں پر عمل نہ کرنے پر توجہ نہیں دی گئی جو خطے میں کشیدگی اور عدم استحکام کا ایک اہم ذریعہ ہے اور نہ ہی اس میں بھارت کے غیر قانونی مقبوضہ جموں و کشمیر میں انسانی حقوق کی سنگین صورتحال کا نوٹس لیا گیا ہے۔
ترجمان دفتر خارجہ کا کہنا تھا کہ افسوسناک امر یہ ہے کہ یہ بین الاقوامی ذمہ داری سے دستبرداری کے مترادف ہے۔
انہوں نے بین الاقوامی شراکت داروں پر زور دیا کہ وہ جنوبی ایشیا میں امن و سلامتی کے معاملات پر جامع اور معروضی نقطہ نظر اپنائیں اور ایسے موقف کی توثیق سے گریز کریں جو یکطرفہ اور زمینی حقائق سے ہٹ کر ہو۔
یہ بھی پڑھیں: غزہ میں امریکہ اور اسرائیل کے عزائم پورے نہیں ہوںگے، پاکستان نیشنل فورم
ترجمان شفقت علی خان نے سعودی عرب میں فلسطینی عوام کے لئے ایک ریاست کے قیام سے متعلق اسرائیلی وزیر اعظم کے حالیہ بیان کی مذمت کرتے ہوئے اسے "غیر ذمہ دارانہ، اشتعال انگیز اور بلا سوچے سمجھے‘‘ قرار دیتے ہوئے کہا کہ یہ فلسطینی عوام کے حق خود ارادیت اور ان کی اپنی تاریخی اور قانونی سرزمین پر ایک آزاد ریاست کے جائز حقوق کی خلاف ورزی اور نظرانداز کرنے کے مترادف ہے۔
