عالمی فوجداری عدالت پر ٹرمپ کی پابندی، خطرناک اور ناقابل قبول، 79 ممالک کا باضابطہ بیان جاری

شیعہ نیوز: این بی سی نیوز کے مطابق، دنیا کے 79 ممالک نے عالمی فوجداری عدالت پر پابندی عائد کرنے پر مبنی ٹرمپ کے اقدام کی مذمت کی ہے۔

رپورٹ کے مطابق ان 79 ممالک نے زور دیکر کہا ہے کہ ایسے اقدامات کے نتیجے میں سنگین جرائم سے استثنی حاصل ہونے کے خطرے میں اضافہ ہوتا چلا جائے گا۔

ان ممالک میں کینیڈا، جرمنی، فرانس جیسے ممالک کا نام بھی دیکھا جا سکتا ہے جو ہمیشہ امریکی کی سرپرستی میں رہنا پسند کرتے ہیں۔

یہ بھی پڑھیں : غزہ غیور فلسطینیوں کی سرزمین ہے ٹرمپ کے بیان کی شدید مذمت کرتے ہیں، علامہ عارف واحدی

جاری شدہ بیان میں آیا ہے کہ واشنگٹن کی پابندی کے نتیجے میں ان 79 ممالک کی شہریت رکھنے والے جرائم کے متاثرین، گواہوں اور عالمی فوجداری عدالت کے عہدے داروں کی خفیہ معلومات بھی خطرے میں پڑ سکتی ہے۔

واضح رہے کہ ٹرمپ نے جمعرات کو عالمی فوجداری عدالت کے کارکنوں اور ان کے اہل خانہ پر مالی اور ویزا پابندی کے حکم پر دستخط کیا تھا۔

ٹرمپ کا یہ حکم نامہ اس وقت جاری ہوا جب صیہونی حکومت کے وزیر اعظم نیتن یاہو واشنگٹن میں موجود تھے۔

یاد رہے کہ نومبر 2024 کو عالمی فوجداری عدالت نے نیتن یاہو اور صیہونی حکومت کے سابق وزیر جنگ یوآو گالانت کو جنگی مجرم قرار دیتے ہوئے ان کی گرفتاری کا حکم جاری کیا تھا۔