عورت مارچ معاشرے کیلئے کینسر سے بھی بدتر بیماری ہے، علامہ جواد نقوی
شیعہ نیوز:علامہ سید جواد نقوی کا تحریک بیداری امت مصطفی (شعبہ خواتین) کے مرکزی کنونشن سے خطاب میں کہنا تھا کہ ہم نے عورت کو اس کی تکریم لوٹانی ہے، جو نبی کریم ﷺ نے چودہ سو سال پہلے زندہ کی تھی۔ انہوں نے کہا کہ حجاب کی مخالفت کی اصلی وجہ یہ ہے کہ اس سے عورتوں کی بے آبروئی کی مغرب کی اسٹریٹیجی کے لئے مشکلات پیدا ہو جاتی ہیں اور ان کے راستے میں رکاوٹیں آتی ہیں۔
انہوں نے مغربی طرز فکر سے متاثر ہو کر عورت مارچ کو معاشرے کے لئے کینسر سے بھی بدتر قرار دیا اور کہا کہ اگر اس فکر کا مقصد بے عفّتی، شہوت رانی، اخلاقی حدود کو پامال کرنا، بے پردہ ہو کر گھر سے نکلنا، محرم نا محرم کی تمیز کئے بغیر لوگوں میں مغربی طرز پر رہن سہن رکھنا ہو اور خاندانی آشیانے کو ویران کرکے نسلوں کو خراب اور بے سرپرست قرار دینا ہے تو ہم قبول کرتے ہیں، کہ اسلام نے ایسی آزادی عورت کو نہیں دی ہے، یہ آزادی تو اسلام میں مردوں کیلئے بھی نہیں دی گئی۔
انہوں نے کہا کہ آج اس جدید اور متمدن دور میں خواتین پر ظلم و ستم بھی جدید طریقے سے ہو رہا ہے۔ جھوٹے نعرے اور دھوکہ کے ذریعے، جمہوریت اور خواتین کی آزادی و حقوق کے نام پر عورتوں پر ظلم و ستم کر رہے ہیں۔ مختلف ممالک میں خصوصاً یورپی ممالک میں عورت کو اپنا سرمایہ اور مال و دولت کی خرید و فروخت کیلئے پبلسٹی کا وسیلہ قرار دیتے ہیں۔ اس طرح خاندان جو ہر انسان کی تشخص برقرار رکھنے کا ایک شرافت مندانہ وسیلہ تھا، درہم برہم کر دیا گیا ہے۔
ان کا مزید کہنا تھا کہ حجاب، پاکدامنی اور مرد عورت کے بیچ فاصلے کو ملحوظ رکھنا، مردوں کے ہاتھوں استحصال کا شکار نہ ہونا، خود کو غیر مردوں کی لطف اندوزی کا سامان قرار دینے کی پستی میں نہ گرنا اور تحقیر برداشت نہ کرنا مسلم خواتین کی خصوصیات ہیں جس کی انہیں حفاظت کرنی چاہیے۔ انہوں نے کہا کہ رسول اسلام ص کی تحریک حضرت خدیجتہ الکبریٰ، حضرت فاطمتہ الزہرا سلام اللہ علیہا اور حضرت زینب سلام اللہ علیہا جیسی خواتین کے مرہون منت ہے جو مردوں سے بھی پہلے دین اسلام کی مددگار بنیں اور یہ مغربی تہذیب کی بھول ہے کہ ہماری خواتین یہ اسوات حسنہ بھول جائینگی۔
