شام میں جولانی کی ملی بھگت سے صیہونی فوج کے قبضے کا سلسلہ جاری، ہزاروں شامی شہری بے گھر
شیعہ نیوز: باخبر ذرائع کے مطابق، شام کے جنوبی علاقوں پر صیہونی فوج کی مسلسل جارحیت کے نتیجے میں، ہزار سے زیادہ گھرانے بے گھر ہوچکے ہیں۔
رپورٹ کے مطابق، صیہونی فوجیوں نے شام کے حدود کے اندر جارحیت جاری رکھتے ہوئے قنیطرہ اور درعا صوبوں میں متعدد دیہی علاقوں، شاہراہوں اور اسٹریٹیجک مراکز پر قبضہ کرلیا ہے جس کے نتیجے میں ہزاروں شامی شہری اپنا گھربار چھوڑ کر دیگر علاقوں کی جانب بھاگنے پر مجبور ہوگئے ہیں۔
یہ بھی پڑھیں : بغداد خطے کو درپیش صیہونی خطرات پر خاموش نہیں بیٹھے گا، شیخ ھمام حمودی
باخبر ذرائع کے مطابق، جولانی حکومت سے وابستہ عناصر نے شامی شہریوں کی آوارہ وطنی پر مکمل خاموشی اختیار کر رکھی ہے۔
بتایا گیا ہے کہ صیہونیوں کا ان علاقوں پر قبضہ آہستہ رفتار لیکن منظم طریقے سے جاری ہے اور شام کے وسیع علاقوں پر ہتھیاروں کے بل پر قبضہ کیا جا رہا ہے۔
عینی شاہدوں کے مطابق، جہاں جہاں صیہونی فوجی آگے بڑھتے ہیں، جولانی سے وابستہ مسلح عناصر بغیر کسی مزاحمت کے پیچھے ہٹ جاتے ہیں جو اس بات کا منہ بولتا ثبوت ہے کہ یہ اقدام صیہونی حکومت اور دمشق پر قابض ٹولے کی ملی بھگت سے کیا جا رہا ہے۔
قابل ذکر ہے کہ بشار اسد کا تختہ الٹنے کے بعد، شام میں موجود افرا تفری کا فائدہ اٹھاتے ہوئے صیہونی حکومت نے شام پر قبضہ کرنے کے سلسلہ اور رفتار پر اضافہ کردیا ہے۔
