واہ کینٹ، بچوں نے دہشتگردی کی کوشش ناکام بنادی، سکول کے قریب سے دھماکہ خیز مواد برآمد

شیعہ نیوز (ٹیکسلہ) واہ کینٹ میں ایک اسکول کے نزدیک شاپنگ بیگ میں ایک دیسی ساختہ دھماکا خیز ڈیوائس پائی گئی تھی۔ تفصیلات کے مطابق طالبعلموں نے صبح تقریباً ساڑھے سات بجے اپنے اسکول کے قریب ایک بس اسٹاپ پر ایک بیگ رکھا دیکھا۔ انہوں نے اپنے ٹیچر کو اطلاع دی، جنہوں نے مقامی انتظامیہ اور پولیس سے رابطہ کیا۔ اس کے فوراً بعد ہی فوجی حکام وہاں پہنچ گئے اور اس بیگ کو ایک قریبی میدان میں لے گئے۔ بم ڈسپوزل اسکواڈ کے اہلکار جنہیں راولپنڈی سے طلب کیا گیا تھا، تقریباً دس بجے وقوعہ پر پہنچے اور اس ڈیوائس کو فیوز کرکے اس میں سے دھماکا خیز مواد برآمد کرلیا۔ نویں جماعت کے طالبعلم مسعود احمد، جنہوں نے یہ بیگ دیکھا تھا، نے بتایا ’’ہم اسکول کے قریب اپنے دوستوں کا انتظار کر رہے تھے، جب ہم نے ایک مشتبہ بیگ رکھا دیکھا، جس کی ہم نے اپنے ٹیچر کو رپورٹ کی۔‘‘ ایک استاد نے اپنا نام ظاہر نہ کرنے کی شرط پر بتایا کہ جب سے پشاور میں آرمی پبلک اسکول پر حملہ ہوا ہے، طالبعلم کہیں زیادہ چوکس ہوگئے ہیں۔ صحافیوں سے بات کرتے ہوئے سب ڈویژنل پولیس آفیسر سلیم خٹک نے کہا کہ یہ ڈیوائس ایک اخبار میں لپٹی ہوئی شاپنگ بیگ کے اندر رکھی تھی۔ انہوں نے کہا ڈیوائس میں آدھا کلو گرام دھماکا خیز مواد، بال بیئرنگ، دھاتی ٹکڑے، ایک سرکٹ اور فائر کریکر پر مشتمل تھی۔ پولیس آفیسر نے بتایا ’’یہ دھماکا خیز ڈیوائس اس طرح ڈیزائن کی گئی تھی کہ اگر اس کو غلطی سے کھولنے کی کوشش کی جاتی یا اس پر کوئی بھاری چیز رکھ دی جاتی تو یہ دھماکے کے ساتھ پھٹ جاتی اور نقصان کا سبب بن سکتی تھی۔‘‘