پاک ایران گیس پائپ لائن منصوبہ جلد مکمل کیا جائے، پیر اعجاز ہاشمی

شیعہ نیوز (پاکستانی شیعہ خبر رساں ادارہ) جمعیت علما پاکستان کے مرکزی صدر پیر اعجاز ہاشمی 26 مارچ بروز ہفتہ اسلامی جمہوری ایران کے صدر حجتہ الاسلام حسن روحانی سے اسلام آباد میں ملاقات کریں گے۔ ملاقات کی دعوت ایران کے سفیر مہدی ہنر دوست کی طرف سے دی گئی ہے جو کہ مقامی ہوٹل میں دیگر دانشوران، سیاسی اور مذہبی رہنماوں کیساتھ ہوگی۔ ملاقات میں باہمی دلچسپی کے امور پر گفتگو کے ساتھ اتحاد امت اور دونوں عوام کے دیرینہ ثقافتی اور اسلامی تعلقات پر بھی تبادلہ خیال کیا جائے گا۔ پیر اعجاز ہاشمی نے لاہور میں میڈیا سے گفتگو میں کہا کہ صدر حسن روحانی کے دورہ پاکستان کے باہمی تعلقات اور عالمی حالات پر اچھے اثرات مرتب ہوں گے۔ انہوں نے کہا کہ دونوں ممالک کے درمیان تجارت کا فروغ عوام اور حکومتوں کے مفاد میں ہے، ایران کا امت مسلمہ میں کلیدی کردار ہے، جبکہ عالمی سطح پر اسلامی جمہوریہ کی پالیسیوں کے سبھی معترف ہیں۔ ان کا کہنا تھا کہ پاکستان کو امت مسلمہ کے اتحاد کیلئے کوشش کرنی چاہیے، 34 مسلم ممالک کے اتحاد کی بجائے تمام اسلامی ریاستوں کا مسلم دفاعی بلاک تشکیل دیا جائے، جس سے اسلام کا بول بالا اور استعماری قوتوں کا منہ کالا ہو گا۔ جے یو پی کے سربراہ نے کہا کہ پاکستان کو فی الفور گیس پائپ لائن منصوبے کو مکمل کرنا چاہیے، جسے ایران اپنی طرف سے مکمل کر چکا ہے، اس سے ملک کی توانائی کی ضروریات پوری ہوں گی، ایران نے پاکستان کا ہر مشکل وقت میں ساتھ دیا ہے، قیام پاکستان کے وقت سب سے پہلے تسلیم کیا ہمیں ہندوستان کی نسبت ایران سے اپنے تعلقات بڑھانے چاہیں۔