سکیورٹی اداروں کی کارروائی، لاہور سے 3 دہشت گرد گرفتار

شیعہ نیوز (پاکستانی شیعہ خبر رساں ادارہ) کاؤنٹر ٹیررازم ڈیپارٹمنٹ نے شہر کے مخلتف علاقوں میں کارروائی کرتے ہوئے دہشت گردی کی منصوبہ بندی کرنے والے 3 دہشت گردوں کو گرفتار کر لیا ہے۔ ذرائع کے مطابق کاؤنٹر ٹیررازم ڈیپارٹمنٹ نے لاہور کے علاقوں لاری اڈا، گڑھی شاہو اور مزنگ میں کارروائی کے دوران 3 مبینہ دہشت گردوں کو گرفتار کر لیا ہے جب کہ اس دوران کالعدم تنظیم کا کمانڈر اسد اپنے ایک ساتھی سمیت فرار ہونے میں کامیاب ہو گیا۔ سی ٹی ڈی ذرائع کے مطابق گرفتار ملزمان دہشت گردی کی بڑی کارروائی کی منصوبہ بندی کر رہے تھے اور ان کے قبضے سے بارودی مواد، گرنیڈ اور ڈیٹونیٹر بھی برآمد ہوا ہے۔ کاؤنٹر ٹیررازم ڈیپارٹمنٹ ذرائع کا کہنا ہے کہ ملزمان لاہور میں ریلوے ورکشاپ پر حملے سمیت دہشت گردی کی کارروائیوں میں ملوث ہو سکتے ہیں تاہم ان کے خلاف مقدمات درج کر کے تفتیش شروع کر دی گئی ہے جب کہ ان کے دیگر ساتھیوں کی گرفتاری کے لیے چھاپے میں مارے جا رہے ہیں۔ گرفتار ہونے والے دہشت گردوں میں محبوب، یاسر اور خرم شامل ہیں۔ ذرائع کے مطابق مبینہ دہشت گرد کراچی کے بعد لاہور میں بھی بڑی واردات کرنا چاہتے تھے جو ناکام بنا دی گئی ہے۔