خرم ذکی کے قتل کی تحقیقات میں اہم پیشرفت، ملزمان کے خاکے تیار

شیعہ نیوز (پاکستانی شیعہ خبر رساں ادارہ) سول سوسائٹی کے نمائندے خرم ذکی کے قتل کی تحقیقات میں اہم پیش رفت ہوئی ہے، تفتیشی حکام نے ملزمان کے خاکے تیار کر لئے ہیں۔ تفصیلات کے مطابق کراچی پولیس نے سماجی کارکن خرم ذکی کو قتل کرنے والے ملزمان کے خاکے تیار کر لئے ہیں۔ پولیس حکام کے مطابق عینی شاہدین اور خرم ذکی کے زخمی دوستوں کے بیانات کی مدد سے ملزموں کے خاکے تیار کئے گئے ہیں۔ پولیس کے مطابق جائے وقوعہ سے نائن ایم ایم پستول کے 19 خول ملے، جنہیں قبضے میں لیکر فارنزک لیبارٹری بھجوا دیا گیا۔ خرم ذکی کے قتل میں نائن ایم ایم کے دو پستول استعمال ہوئے، یہ پستول پہلے کسی واردات میں استعمال نہیں ہوئے ہیں۔ تفتیشی حکام کا کہنا ہے کہ خرم ذکی کے قتل کے تانے بانے سبین محمود قتل سے بھی ملتے ہیں۔ جس کی بنا پر زیر حراست کالعدم تنظیموں کے کارکنوں سمیت سبین محمود قتل میں گرفتار ملزموں سے بھی تفتیش کی جائے گی۔