نگراں حکومت پنجاب اوچھے ہتھکنڈوں پر اُتر آئی ہے
شیعہ نیوز (پاکستانی شیعہ خبر رساں ادارہ) نگراں حکومت پنجاب اوچھے ہتھکنڈوں پر اُتر آئی ہے، نہتے عوام پر کیمیکل پانی کا استعمال انسانی و آئینی حقوق کی کھلم کھلا خلاف ورزی ہے۔
تفصیلات کے مطابق مجلس وحدت مسلمین خیبر پختونخوا کے صوبائی صدر علامہ جہانزیب علی جعفری نے زمان پارک آپریشن کی شدید مذمت کرتے ہوئے کہا کہ پنجاب کی نگران حکومت اوچھے ہتھکنڈوں پر آتر ائی ہے، نہتے عوام پر کیمیکل پانی کا استعمال انسانی و آئینی حقوق کی کھلم کھلا خلاف ورزی ہے، جس کی جتنی مذمت کی جائے کم ہے، عمران خان کی گرفتاری ملک میں الیکشنز کے ماحول میں تاخیری حربے استعمال کرنے کے مترادف ہے، جو کسی بھی صورت میں قابل قبول عمل نہیں ہے۔
یہ خبر بھی پڑھیں حکومت زمان پارک میں نہتے عوام پرپولیس گردی بند کرے
انہوں نے کہا کہ ملک میں سیاسی عدم استحکام روز بروز بڑھتا جا رہا ہے جس سے ملکی معیشت بھی شدید زبوں حالی کا شکار ہو چکی ہے لیکن حکومتی ترجیحات میں سیاسی حریفوں کو سختی سے کچلنے جیسے غیر آئینی عمل کے سوا کچھ نہیں ہے۔
انہوں نے مزید کہا کہ پاکستان تحریک انصاف کی عوامی مقبولیت نے حکومتی ٹولے کی نیندیں اڑا دی ہیں۔ عام کارکنان پر لاٹھی چارج اور شیلنگ حکومتی بوکھلاہٹ کو عیاں کر رہا ہے۔ نگران حکومت کا کام شفاف اور بروقت الیکشنز کے انعقاد کو یقینی بنانا ہوتا ہے لیکن موجودہ حکومت پرتشدد کارروائیوں سے اپنی غیر جانبدارانہ حیثیت کھو چکی ہے۔
