سیہون سڑک حادثے میں شہداء کے لواحقین سے علامہ ناصر عباس جعفری کی تعزیت

شیعہ نیوز: سیہون شریف سڑک حادثے میں معروف منقبت خواں خواجہ علی کاظم اور سید علی جان رضوی سمیت شہید علامہ حسن ترابی کے فرزند زین ترابی کی المناک شہادت پر سربراہ مجلس وحدت مسلمین سینیٹر علامہ راجہ ناصر عباس جعفری نے تعزیتی پیغام جاری کیا۔

اپنے تعزیتی پیغام میں علامہ راجہ ناصر عباس جعفری نے کہا کہ یہ بہت افسوسناک خبر ہے کہ معروف کمسن منقبت خوان خواجہ علی کاظم نوجوان منقبت خوان سید علی آغا جان اور شہید علامہ حسن ترابی کے فرزند زین ترابی ایک المناک حادثے میں جامِ شہادت نوش کر گئے ہیں۔ یہ سانحہ نہ صرف منقبت خوانی کے شعبے کے لیے ایک بڑا نقصان ہے بلکہ اہلِ محبت کے دلوں پر بھی گہرا اثر چھوڑ گیا ہے۔

یہ بھی پڑھیں: کرُم مسائل، ممبر قومی اسمبلی انجینئر حمید حسین کی سابق وزیر اعظم راجہ پرویز اشرف سے ملاقات

سڑک حادثے میں شہید خواجہ علی کاظم اور سید علی آغا جان نے اپنی خوبصورت آواز اور عقیدت بھرے کلام سے اہلِ بیتؑ کی محبت کو عام کیا۔ ان کی منقبت خوانی ہمیشہ سننے والوں کے دلوں میں ایمان و عشق کی روشنی بکھیرتی رہے گی۔

ہم بارگاہِ الٰہی میں دعاگو ہیں کہ ربِ کریم مرحومین کو جوارِ اہلِ بیتؑ میں اعلیٰ مقام عطا فرمائے، ان کی مغفرت فرمائے اور ان کے اہلِ خانہ، عزیز و اقارب اور چاہنے والوں کو صبرِ جمیل عطا کرے۔ آمین۔