بلوچستان: جعفر ایکسپریس پر دہشتگردوں کا حملہ، متعدد شہید، سینکڑوں اغواء
کوئٹہ سے پشاور جانے والی جعفر ایکسپریس پر بولان کے علاقے میں دہشتگردوں کا حملہ، ٹرین کو جلا کر 100 سے زائد مسافروں کو اغواء کر لیا گیا
شیعہ نیوز: ملک میں دہشت کی ایک اور لرزہ خیز واردات، جعفر ایکسپریس پر دہشتگردوں کا حملہ۔ ابتدائی اطلاعات کے مطابق کوئٹہ سے پشاور جانے والی جعفر ایکسپریس پر بولان کے علاقے میں دہشتگردوں کا حملہ، ٹرین کو جلا کر 100 سے زائد مسافروں کو اغواء کر لیا گیا۔ مسلح حملہ آوروں نے چلتی ہوئی ٹرین پر اندھا دھند فائرنگ کی، جس سے مسافروں میں شدید خوف و ہراس پھیل گیا۔ گولیوں کی گھن گرج سے ریل کی پٹڑیاں لرز اٹھیں جبکہ حملہ آوروں نے ٹرین کے انجن اور بوگیوں کو نشانہ بنایا گیا۔
ذرائع کے مطابق اس افسوسناک واقعے میں ٹرین کے بہادر ڈرائیور امجد یاسین شہید ہوگئے، جو آخری لمحے تک انجن کو کنٹرول میں رکھنے کی کوشش کرتے رہے۔ حملے کے دوران ایک زوردار دھماکہ بھی ہوا، جس نے کئی بوگیوں کو تباہ کر دیا۔ رپورٹس کے مطابق دہشتگردوں نے ٹرین اور مسافروں کو یرغمال بنا لیا ہے، جبکہ سیکیورٹی فورسز علاقے کی جانب روانہ ہو چکی ہیں۔
یہ بھی پڑھیں: پاراچنار کی ابتر صورتحال، مجلس وحدت مسلمین کے وفد کی اسد قیصر سے ملاقات
یہ حملہ ایک خوفناک یاد دہانی ہے کہ ملک میں دہشتگردی کے خطرات ابھی تک منڈلا رہے ہیں۔ مزید تفصیلات کا انتظار کیا جا رہا ہے۔
حملے کی ویڈیو ملاحظہ فرمائیں:
