سب کو پتا ہے ابھی نندن کیساتھ کیا ہوا تھا، ، وزیردفاع
شیعہ نیوز:وزیر دفاع خواجہ آصف نے کہا ہے کہ پہلگام حملے کا الزام پاکستان پر لگانا نامناسب ہے، بھارتی حکومت پہلگام واقعے کی تحقیقات کرے اور سہولت کاروں کو تلاش کرے، اگر کوئی صورتحال بنتی ہے تو پاکستان بھرپور جواب دینے کی پوزیشن میں ہے، جب فضائی حدود کی خلاف ورزی کی گئی تھی تو سب کو پتا ہے کہ ابھی نندن کے ساتھ کیا ہوا تھا۔
ڈان نیوز کے مطابق وزیر دفاع خواجہ آصف نے کہا کہ پاکستان دہشت گردی کا سب سے بڑاشکار ہے اور کئی دہائیوں سے دہشت گردی کا مقابلہ کررہا ہے، پہلگام حملے کا الزام پاکستان پر لگانا نامناسب ہے، دنیا میں کہیں بھی دہشت گردی ہو اس کی مذمت کرتے ہیں۔
انہوں نے کہا کہ پاکستان جیسا ملک کیسے دہشت گردوں کی پشت پناہی کرسکتا ہے جہاں بے گناہ لوگ شہید ہورہے ہیں، پاکستان میں شہدا کی تعداد ہزاروں میں ہے۔
انہوں نے مزید کہا کہ سیکیورٹی فورسز ہرجگہ دہشت گردی کا مقابلہ کررہی ہیں، ہوسکتا ہے بھارت فالس فلیگ آپریشن کرکے ملبہ پاکستان پر ڈال دے۔وزیردفاع نے کہا کہ پاکستان میں دہشت گردی کے واضح تانے بانے بھارت سے ملتے ہیں نہیں سمجھتا کہ بھارتی سرپرستی کے بغیر پاکستان میں دہشت گردی ہوسکتی ہے، پاکستان میں دہشت گردی کرنیوالوں کو سرحدپار سے سپورٹ مل رہی ہے۔
انہوں نے کہا کہ ایک شخص چند دن پہلے پاکستانی سرحد پرپکڑا گیا ہے، سب کو پتا ہے بلوچستان کے علیحدگی پسندوں کو بھارت نے پناہ دی ہوئی ہے، بلوچستان کے علیحدگی پسندبھارت میں علاج کراتے ہیں جو ریکارڈ پر ہے اور پاکستان میں دہشت گردی کیلئےسرپرستی اور مالی معاونت بھی ہوتی رہی ہے۔
خواجہ آصف نے کہا کہ پاکستان دہشت گردی کی مذمت کرنے کیلئے عالمی برادری کے ساتھ کھڑا ہے، 7لاکھ بھارتی فوج کئی دہائیوں سے مقبوضہ کشمیر میں ہے، اگر بےگناہ لوگ مارے جارہے ہیں تو بھارتی فوج وہاں کیاکررہی ہے۔
انہوں نے کہا کہ بھارتی حکومت پہلگام واقعے کی تحقیقات کرے اور سہولت کاروں کو تلاش کرے، اگر کوئی صورتحال بنتی ہے تو پاکستان بھرپور جواب دینے کی پوزیشن میں ہے، جب فضائی حدود کی خلاف ورزی کی گئی تھی تو سب کو پتا ہے کہ ابھی نندن کے ساتھ کیا ہوا تھا۔
افغانستان کے ساتھ تعلقات کے حوالے سے انہوں نے کہا کہ دو سال پہلے بھی کابل گیا تھا مگر اس کے نتائج اتنے خوشگوار نہیں نکلے تھے، دو سال پہلے بھی جاکر بتایا تھا کہ دہشت گردوں کی پناہ گاہیں آپ کی سرزمین پر ہیں، اس کے بعد بھی کوئی تبدیلی نہیں آئی تھی بلکہ دہشت گردی میں اضافہ ہوا تھا۔
خواجہ آصف نے کہا کہ ابھی نائب وزیراعظم افغانستان سے ہوکر آئے ہیں، دعا ہے نائب وزیراعظم کے دورے کے نتائج اچھے نکلیں اور پاکستان اور افغانستان کے تعلقات امن کی سمت میں چلیں۔
انہوں نے کہا کہ نوازشریف سے پونے 2 گھنٹے ملاقات ہوئی تھی، راناثنااللہ کے پیپلزپارٹی سے رابطے ہوئے ہیں، اور اس سے پہلے ڈاکٹر مالک کی نوازشریف سے ملاقات ہوئی تھی جس میں تفصیلی گفتگو ہوئی تھی اور اس گفتگو پر پیشرفت بھی ہوئی ہے۔
خواجہ آصف نے کہا کہ بلوچستان میں ناراض لوگوں کو قریب لانے میں نوازشریف کردار ادا کرسکتے ہیں، نوازشریف سیاسی عناصر کو بھی قریب لانے میں کردار اداکرسکتے ہیں، وہ ایک دو روز میں واپس آرہے ہیں۔
انہوں نے کہا کہ جوبھی صورتحال ہوگی ہم پیپلزپارٹی کے ساتھ بیٹھ کر بہترین حل نکالیں گے، یہ ایسامسئلہ ہے جسے سیاستدان گفتگو سے حل کرسکتے ہیں، مسائل گفتگوسے حل ہوجائیں تو بہتر ہوتا ہے۔
پی ٹی آئی کے حوالے سے انہوں نے کہا کہ ڈیل کی بات سنتے ہوئے ڈھائی سال ہوگئے لیکن ابھی تک تو کوئی ڈیل نہیں ہوئی، یہ خودہی کہتے ہیں بات ہوگئی پھر کہتے ہیں بات نہیں ہوئی۔
