کراچی، امام حسینؑ انسٹیٹیوٹ کے تحت کمسن طلباء کے روبوٹکس پروجیکٹس کی نمائش
شیعہ نیوز: شہر قائد میں امام حسینؑ انسٹیٹیوٹ کے زیر اہتمام روبوٹکس نمائش کا انعقاد کیا گیا، کمسن طلباء کی جانب سے بنائے گئے منفرد روبوٹکس پروجیکٹس کا عملی مظاہرہ کیا گیا۔ تفصیلات کے مطابق گلستان سوسائٹی کراچی میں امام حُسینؑ انسٹیٹیوٹ کی جانب سے روبوٹکس سمر کیمپ کے اختتام پر روبوٹس کی منفرد و دلچسپ نمائش کا انعقاد کیا گیا، روبوٹکس نمائش میں پچاس سے زائد کمسن ہونہار طلبہ و طالبات نے اپنی تخلیقی صلاحیتوں کا مظاہرہ کرتے ہوئے پینتیس سے زائد روبوٹکس پروجیکٹس پیش کئے۔ نمائش میں اسمارٹ پارکنگ سسٹم، اسمارٹ کار، فوڈ سرونگ، گیسٹ ویلکم، ہوم سیکیورٹی، آرٹیفشل انٹیلیجنس، اسمارٹ ویکیوم کلینر و دیگر روبوٹکس پروجیکٹس شامل تھے۔
طلباء نے نمائش کے شرکاء کو پروجیکٹس سے متعلق بریفنگ دی اور عملی مظاہرہ بھی کیا۔ شرکاء و والدین نے نمائش کو قابل تعریف و منفرد قرار دیتے ہوئے امام حسینؑ انسٹیٹیوٹ کی کاوش کو سراہا۔ امام حسینؑ انسٹیٹیوٹ کے اساتذہ نے بھی طلباء کی محنت اور صلاحیتوں کو سراہا۔ روبوٹکس نمائش کی میڈیا کوریج کیلئے آئے صحافی بھی طلباء کو داد دیئے بغیر نہ رہ سکے۔ نمائش کے دوران ہینڈ رائٹنگ سمر کیمپ کی طالبات نے بھی اپنی شاندار تخلیقی صلاحیتوں کا مظاہرہ کیا۔ واضح رہے کہ امام حسینؑ انسٹیٹیوٹ کے زیر اہتمام سال بھر کمپیوٹر پروگرامنگ کے ایڈوانس کورسز/لینگویجز کروائے جاتے ہیں۔
