بارود سے بھری گاڑی تیار، کراچی میں دہشت گردوں کے بڑے حملے کا تھریٹ الرٹ جاری

شیعہ نیوز:قومی ادارہ برائے انسداد دہشتگردی (نیکٹا) نے کراچی میں دہشت گردی کے خطرے کے پیشِ نظر تھریٹ الرٹ جاری کردیا اور کہا کسی اہم سرکاری عمارت کونشانہ بنایا جاسکتا ہے۔

تفصیلات کے مطابق کراچی میں دہشت گردی کے خطرہ کے پیش نظر قومی ادارہ برائے انسداد دہشتگردی (نیکٹا) نے ایک اورتھریٹ الرٹ جاری کردیا ہے ، جس میں کہا ہے کہ حملےکیلئے بارود سے بھری گاڑی تیارکرلی گئی ہے،کراچی کےکسی مضافاتی علاقےمیں گاڑی تیاری کی اطلاعات ہیں۔

الرٹ میں کہا گیا کہ غیر ملکی ایجنسیاں حملےکی منصوبہ بندی کرچکی ہیں، کسی اہم سرکاری عمارت کونشانہ بنایاجاسکتا ہے، پولیس رینجرزاورمتعلقہ ادارے سکیورٹی انتظامات کو یقینی بنائیں ۔

نیکٹا کے تھریٹ الرٹ کے بعد کراچی میں سیکیورٹی ہائی الرٹ کردی گئی ہے۔

یاد رہے نیکٹا نے اس سے قبل بھی تھریٹ الرٹ جاری کیاتھا، جس میں کہا تھا کہ غیر ملکی ایجنسیاں کراچی میں دہشتگردی کی منصوبہ بندی کر رہی ہیں اور شہر کے اہم سرکاری دفتر یا عمارت کو نشانہ بنایا جا سکتا ہے۔